რუსეთმა უკრაინასთან ომში ნამდვილი სისასტიკე გამოიჩინა და NATO-მ უნდა იფიქროს უფრო მკაცრ ზომებზე, რადგან სანქციებმა ვერ აიძულა უკანდახევა აგრესორი ქვეყნის ლიდერს, ვლადიმირ პუტინს.

რუსი ოკუპანტების ბარბაროსობის მოთმენა უკვე შეუძლებელია, ხოლო “დასავლეთის შემდგომი სამარცხვინო, უშედეგო “წამოყვირებები” – დაუშვებელი”.

ასეთი თეზისებით წარსდგა ბრიტანული ცნობილი გამოცემა The Observer მკითხველის წინაშე სარედაქციო სვეტში. გამოცემამ დაამუნათა დასავლეთის წამყვანი ქვეყნები უკრაინის არასაკმარისი მხარდაჭერის გამო და მათგან “უფრო მკაცრი” მოქმედება მოითხოვა იმისთვის, რომ “პუტინი დააშინონ”.

გამოცემამ კრამატორსკის დაბომბვა გაიხსენა და მას უწოდა “აქტი, რომლის პატიება შეუძლებელია”.

“კიდევ რამდენი მსგავსი სისასტიკე უნდა ვნახოთ, რათა დასავლეთი მიხვდეს, რომ მათი უკრაინული სტრატეგია ჩაფლავდა? კიდევ რამდენი ბავშვი უნდა დაიღუპოს, სანამ NATO შეეშვება უაზრო თავის მართლებას მისი უმოქმედობის გამო? კიდევ რამდენი დრო უნდა გავიდეს იქამდე, სანამ ჯო ბაიდენი, ბორის ჯონსონი, ოლაფ შოლცი და ყველა სხვაც შეეჯახებიან არჩევანს, რომელიც გარდაუვალი ჩანს: დაუყოვნებელი ჩარევა თუ დამარცხება?’ – რიტორიკულ კითხვას სვამს გამოცემა.

“პუტინისთვის სულერთია. ის არ ჩერდება და არც არანაირი ნიშანი არსებობს, რომ მომავალში გაჩერდება. იმედები, რომ შიდა ოპოზიცია მის ხელისუფლებას ჩამოაგდებს, იმედებად დარჩა.

ამ დროს კი მამაცი, შეშინებული უკრაინის მოქალაქეები მორიგ სასტიკ დარტყმას ელოდებიან, მათი პრეზიდენტი მეტ ირაღსა და მეტ დახმარებას იხვეწება”, – აღნიშნულია სტატიაში.

–

თუ თქვენ გსურთ სმარტფონით მიიღოთ მოკლე, გადამოწმებული, ოპერატიული ინფორმაცია უკრაინაში მიმდინარე მოვლენებზე, ეწვიეთ ჩვენს გვერდს ტელეგრამზე.