ლიეტუვის რესპუბლიკის სეიმმა გამოაქვეყნა საგარეო საქმეთა კომიტეტის განცხადება, რომელშიც წერია, რომ კომიტეტი მხარს უჭერს საქართველოს ტერიტორიულ მთლიანობას, ასევე საქართველოს ხელისუფლებისა და ქართველი ხალხის მოთხოვნას ევროკავშირსა და NATO-ში გაწევრიანებზე.
კომიტეტი ასევე მოუწოდებს საქართველოს მთავრობას, ხელი შეუწყოს ყოფილი პრეზიდენტის მიხეილ სააკაშვილის ევროპულ სახელმწიფოში გადაყვანას სასწრაფო მკურნალობისთვის, რაც “ხელს შეუწყობდა დეპოლარიზაცას და საქართველოს საშინაო და საგარეო საქმეებში რუსეთისა და მისი სატელიტების ჩარევის პრევენციას მოახდენდა”.
ლიეტუვა აცხადებს, რომ შეშფოთებულია საქართველოს მთავრობის საჯარო უარით რუსეთის წინააღმდეგ დაწესებულ ეკონომიკურ და ინდივიდუალურ სანქციებზე,თუმცა ლიეტუვა აფასებს ქართველი ხალხის სრულ მხარდაჭერას და სოლიდარობას უკრაინის მიმართ, ამიტომ მხარს დაუჭერს საქართველოს ნატოში გაწევრიანების სამოქმედო გეგმის შემუშავებას და მისთვის ევროკავშირის კანდიდატი ქვეყნის სტატუსის მინიჭებას.
განცხადებაში ასევე აღნიშნულია, რომ საქართველოსა და უკრაინას საერთო ევროპული პერსპექტივა აქვთ და რომ ორივე წარმოადგენს რუსეთის აგრესიული პოლიტიკის სამიზნეს, რომლის მთავარი მიზანია ამ ორი ქვეყნის თავის გავლენის სფეროში დაბრუნება;
კომიტეტი გმობს პოლიტიკური ნების ნაკლებობას, რამაც ხელი შეუშალა საერთაშორისო საზოგადოებას 2008 წელს, საქართველოსა და უკრაინის ნატოში გასაწევრიანებლად საჭირო გადაწყვეტილების მიღებას. აღნიშნავს, რომ რუსეთის ფედერაციის 2008 წლის აგრესია საქართველოს მიმართ, ისევე როგორც ამჟამინდელი ომი უკრაინაში, სწორედ რომ წარსულში გადაწყვეტილების მიუღებლობის შედეგია.