სატელიტის საშუალებით გადაღებული ფოტომასალა უარყოფს რუსეთის თავდაცვის სამინისტროს მტკიცებას, თითქოს მშვიდობიანი მოსახლეობა ბუჩაში დახოცეს 30 მარტის შემდეგ, როდესაც დასახლებული პუნქტი რუსეთის ჯარმა დატოვა. ამის შესახებ წერს ამერიკული გამოცემა ნიუ-იორკ ტაიმსი, რომლის ცნობით, ვიდეო და სატელიტური ფოტომასალა შესაძლებლობას იძლევა აღინიშნოს, რომ დახოცილთა გვამები დასახლებულ პუნქტში სამ კვირაზე მეტი ხნის განმავლობაში გამოჩნდა. ამ დროს ბუჩა რუსი სამხედრო მოსამსახურეების კონტროლის ქვეშ იმყოფებოდა.

ერთ-ერთ ვიდეოზე, რომელიც ადგილობრივი ადმინისტრაციის წევრმა 2 აპრილს გადაიღო, მრავალი ცხედარი ჩანს იაბლუნსკის ქუჩაზე. ხოლო სატელიტურ სურათებზე, რომლებიც ნიუ-იორკ ტაიმსს კომპანია Maxar Technologies-მა მიაწოდა, სულ მცირე 11 ცხედარია 11 მარტის ქუჩაზე.

ზოგიერთი დახოცილის ცხედრები ბომბის აფეთქების შედეგად წარმოქმნილი ორმოს გვერდით ჩანს, სხვები – მიტოვებული მანქანების შორიახლოს. ზოგიერთ მოკლულს ხელები ზურგს უკან აქვს შეკრული თეთრი ნაჭრით. სიკვდილის მიზეზი უცნობია, წერს ნიუ-იორკ ტაიმსი.

სატელიტური ფოტოების ანალიზი ცხადყოფს, რომ მიტოვებული მანქანები და ცხედრები ბუჩაში 20-21 მარტის შუალედში გამოჩნდა.

მიუხედავად ფოტო და ვიდეომტკიცებულებისა, რუსეთის ხელისუფლება უარყოფს ბუჩაში რუსი სამხედროების მიერ მშვიდობიანი მოსახლეობის დახოცვას და გაეროს უშიშროების საბჭოს სხდომის მოწვევას ითხოვს. ამის შესახებ განაცხადა გაეროში რუსეთის მუდმივი წარმომადგენლის მოადგილემ, დმიტრი პოლიანსკიმ. რუსმა დიპლომატმა „უკრაინელი რადიკალების აღმაშფოთებელი პროვოკაცია“ უწოდა რუსეთის არმიის მიერ კიევის გარეუბანში მშვიდობიანი მოქალაქეების მასობრივი დახოცვის შესახებ გავრცელებულ ინფორმაციას.