„სრულად ვენდობი ინფორმაციას, რომელიც უკრაინის დაზვერვისა და ჩვენი დასავლელი პარტნიორების მიერ იქნა მოწოდებული. არ არის საფუძველი, რომ არ ვენდო, მაგრამ მტკიცებულებები, რომლებსაც თქვენ ითხოვთ, ალბათ, უახლოეს დღეებში გახდება ცნობილი. თუ ასეთი საქმიანობა გაგრძელდება, ჩვენ დავინახავთ შესაბამის მტკიცებულებებს, რა თქმა უნდა”, – ასე უპასუხა   უკრაინის უმაღლესი რადის დეპუტატმა პრეზიდენტ ზელენსკის პოლიტიკური ჯგუფიდან და თავდაცვისა და ეროვნული უშიშროების კომიტეტის წევრმა ფედირ ვენისლავსკიმ შეკითხვას, რომელიც ეხებოდა უკრაინის თავდაცვის სამინისტროს დაზვერვის მთავარი სამმართველოს ცნობას საქართველოს შესახებ.

უკრაინის თავდაცვის სამინისტროს სადაზვერვო სამსახურის ინფორმაციით, რუსები აყალიბებენ სანქცირებული საქონლის კონტრაბანდის არხს, საქართველოს ტერიტორიის გავლით.

„საერთაშორისო სანქციების შემოღების გამო, რუსეთის ფედერაციამ დაკარგა სამხედრო, ორმაგი და სამოქალაქო საქონლის ფართო სპექტრის მიწოდების შესაძლებლობა. სანქციების გვერდის ავლით, რუსი აგენტები ქმნიან კონტრაბანდის არხებს, რომლებიც გადის, კერძოდ, საქართველოს ტერიტორიაზე“, – აცხადებს უკრაინული მხარე და ამატებს: „საქართველოს სპეცსამსახურების წარმომადგენლებს პოლიტიკურმა ხელმძღვანელობამ დაავალა, ხელი არ შეეშალათ კონტრაბანდისტების საქმიანობისთვის“.