“ერთად დავანთოთ სანთლები უკრაინაში დაღუპულთა ხსოვნისთვის” – უკრაინაში დაღუპულთა პატივის მისაგებად დღეს, 20:00 საათზე მოქალაქეებმა პარლამენტის წინ აქცია დააანონსეს. აქციის იდეა მას შემდეგ გაჩნდა, რაც მედიაში და სოციალურ ქსელებში ბუჩაში გადაღებული კადრები გავრცელდა.

“პარლამენტის წინ მდებარე 9 აპრილის მემორიალთან შევიკრიბოთ, რათა პატივი მივაგოთ რუსეთის მიერ უკრაინაში მოწყობილი გენოციდის მსხვერპლებს. დავუფასოთ უკრაინას მსოფლიო თავისუფლებისათვის თავგანწირული ბრძოლა და გაღებული მსხვერპლი”, – წერენ ორგანიზატორები.

უკრაინა აცხადებს, რომ კიევის მახლობლად მდებარე ქალაქებში 410 ცხედარი იპოვეს. სულ მცირე 300 მშვიდობიანი მოქალაქე გარდაცვლილი ნახეს ბუჩაში, მას შემდეგ, რაც უკრაინამ ტერიტორიაზე კონტროლი დაიბრუნა. გარდაცვლილი მოქალაქეების ცხედრებით სავსე იყო ქუჩები, მათ ეტყობოდათ წამების კვალი, ჩანს, რომ ნაწილის დაწვა სცადეს.