უკრაინის ელჩის მისია საქართველოში ამოწურულია. დიპლომატიური დემარშის შემდეგ, იგორ დოლგოვის საბოლოოდ გაწვევას, ვოლოდიმერ ზელენსკიმ ხელი უკვე მოაწერა.
“ხელი მოვაწერე ბრძანებას, დავაბრუნო ელჩი საქართველოდან”, – ამის შესახებ უკრაინის პრეზიდენტმა ვოლოდიმირ ზელენსკიმ გავრცელებულ ვიდეომიმართვაში თქვა. “არსებობენ ისეთებიც, რომლებიც სხვებთან ერთად სახელმწიფოს დასაცავად მოქმედებენ იმისთვის, რომ უკრაინამ თავისი მომავლის არჩევა შეძლოს. ჩვენ ვაფასებთ თითოეული ასეთი ადამიანის ქმედებას. და არსებობენ ისეთები, რომლებიც მხოლოდ იმაზე ფიქრობენ, რომ დარჩნენ იქ, სადაც არიან. დღეს ხელი მოვაწერე, რომ ერთ-ერთი ასეთი ადამიანი, ელჩი, გამოვიწვიო მაროკოდან.
ასევე, მივიღე გადაწყვეტილება, დავაბრუნო ელჩი საქართველოდან. დიდი პატივისცემით, თუ არ იქნება შეიარაღება, სანქციები, შეზღუდვები რუსული ბიზნესისთვის, ეძებეთ სხვა სამსახური. ველოდები კონკრეტულ შედეგებს ლათინური ამერიკიდან, ახლო აღმოსავლეთიდან, ცენტრალური აზიიდან და აფრიკიდან. ანალოგიურს ველოდები სამხედრო ატაშეებისგანაც. დიპლომატიური ფრონტი ერთ-ერთი მნიშვნელოვანი ფრონტია და ყველამ უნდა იმუშაოს მაქსიმალურად ეფექტურად გამარჯვებისა და უკრაინის დახმარებისთვის, ისევე როგორც თითოეული ჩვენი ჯარისკაცი ბრძოლის ველზე”, – ამბობს ზელენსკი.
მანამდე, საქართველოდან ელჩის გაწვევის გადაწყვეტილება უკრაინის პრეზიდენტმა 1-ლ მარტსაც მიიღო.
მიუხედავად იმისა, რომ უკრაინის პრეზიდენტმა საკუთარი გადაწყვეტილების მიზეზი დააკონკრეტა და შეახსენა საქართველოს ხელისუფლებას თავისი პოზიცია, გადამწყვეტ და კრიტიკულ დროს “ქართული ოცნება” ისრებს მაინც ოპოზიციისკენ ამისამართებს. მმართველი გუნდი დღეს იმდენად შორს წავიდა რომ საბოლოოდ საკუთარ გზავნილებში დაიკარგა.