ჭყონდიდის ეპარქიაში შემავალ ბალდის ღვთისმშობლის სახელობის ეკლესიაში, მიტროპოლიტ სტეფანე კალაიჯიშვილის მოლოდინში, მასთან დაპირისპირებულმა სასულიერო პირებმა ეკლესიის კარები ჩაკეტეს.
ერთმანეთს სიტყვიერად დაუპირისპირდნენ მიტროპოლიტის მხარდამჭერი მრევლი და მღვდელმთავარ სტეფანე კალაიჯიშვილის მიერ განკვეთილი სასულიერო პირები. დაძაბულობა პოლიციის დახმარებით განიმუხტა. თუმცა, დროდადრო ისევ მატულობს. ისმის შეძახილები: “წადით მამათმავალი პატრიარქის მხარდამჭერებო”, “ქათმებო”, “ფარშავანგებო”.
“2008 წელი გავიხსენოთ, იქ რომ არ ყოფილიყო ურაპატრიოტული ქმედებები, შეიძლება საერთოდ სხვა სიტუაცია ყოფილიყო და იქ რომ ჩვენი მხრიდან შეჩხიკინება არ ყოფილიყო, შეიძლება აგვეცილებინა 30 კილომეტრში ჯარი”. – თქვა ჭყონდიდის მიტროპოლიტმა, სტეფანემ ქადაგებისას.
მრევლი, მათ შორის საპატრიარქოს ჩოხოსნები, ითხოვდა ტაძრის გაღებას, რათა მიტროპოლიტს ეკლესია ღია დახვედროდა და წირვა-ლოცვის ჩატარების საშუალება მისცემოდა. თავის მხრივ, მათ მოთხოვნას უარით პასუხობდნენ “ამბოხებული” სასულიერო პირები.