გაეროში საქართველოს ყოფილი მუდმივი წარმომადგენელი, უშიშროების საბჭოს ყოფილი მდივანი კახა ლომაია უკრაინის თავზე ცის დახურვის შესახებ გავრცელებულ მოსაზრებებს ეხმიანება და ამ საკითხს პოლონეთის მიერ დღეს მიღებული გადაწყვეტილების კონტექსტში განიხილავს.
“No-fly zone-ის იდეა ხორცს ისხამს
როგორც მოსალოდნელი იყო, თავისუფალი სამყარო პოულობს ფორმებს, რომ გმირ უკრაინას მეტი სამხედრო დახმარება აღმოუჩინოს.
რამდენიმედღიანი დაძაბული მოლაპარაკებების შემდეგ, სადაც ცენტრალურ როლს აშშ თამაშობდა, პოლონეთმა თანხმობა განაცხადა თავისი მოდერნიზებული “მიგები” გადასცეს ნატო-ს, გერმანიაში.
უნდა ვივარაუდოთ, რომ არსებობს გერმანიის მთავრობის ნებართვა, რომ თვითმფრინავები უკრაინელებმა გერმანიის საჰაერო სივრციდან გაიყვანონ. თუ ასე მოხდა, “მიგებს” ჯერ არგამოცხადებული საჰაერო დერეფნით შეიყვანენ უკრაინაში. ეს იქნება უკრაინის მოთხოვნის (no-fly zone) ნაწილობრივი დაკმაყოფილება.
ამას მივუმუტოთ კიდევ ორი უაღრესად მნიშვნელოვანი დღევანდელი გადაწყვეტილება: აშშ-მ რუსული ნავთობის, ნავთობპროდუქტების და ბუნებრივი აირის იმპორტი 100%-ით აკრძალა, ევროკავშირმა კი გადაწყვიტა რუსული ბუნებრივი აირის იმპორტი 2/3-ით შეამციროს 2022-ის ბოლომდე, და სრულად ჩაანაცვლოს 2030-მდე.
როგორც ჩანს, დასავლეთი შუა გზაზე გაჩერებას არ აპირებს.
დიდება უკრაინის შეიარაღებულ ძალებს და უკრაინელ ხალხს!”, – წერს კახა ლომაია.
შეგახსენებთ, უკრაინის ცის გამოცხადებას ფრენისთვის აკრძალულ ზონად, ფაქტობრივად, ომის დაწყების დღიდან ითხოვს უკრაინის პრეზიდენტი ვოლოდიმირ ზელენსკი.