უკრაინისთვის ამ უმძიმეს დღეებში, ამ ქვეყნის პოლიტიკური ცხოვრების ერთ-ერთი მთავარი პირი ქართველი ბიზნესმენი და პოლიტიკოსი დავით არახამიაა (დავით ბრაუნი).
დავით არახამია უკრაინის რადას ფრაქცია “ხალხის მსახურის” თავმჯდომარეა და წარმოადგენს უკრაინულ დელეგაციას რუსულ მხარესთან ცეცხლის შეწყვეტის შესახებ გამართული მოლაპარაკებების დროს. “მოლაპარაკებები ან სწორი მიმართულებით წავა, ან ისე, როგორც რუსული სამხედრო გემი”, – დაწერა მან ბელარუსში გასამართი შეხვედრის წინ.
ის მეხსიერებაში შემორჩენილ, ამჟამად ოკუპირებულ აფხაზეთს ემოციურად იხსენებს:
“ბავშვობა ყოველთვის იმაზე უკეთესი გახსენდება, ვიდრე სინამდვილეში იყო, თუმცა მე მართლა ძალიან კარგი ბავშვობა მქონდა, რადგან გაგრა ნამდვილი მარგალიტი იყო, როგორც მას ადრე უწოდებდნენ… იქ უამრავი, მათ შორის საბჭოთა კავშირის მთელი პარტიული ხელმძღვანელობა ჩადიოდა. იყო უამრავი აგარაკი. გვქონდა პარკი, სადაც მრავალი ეგზოტიკური მცენარე ხარობდა, სადაც ფარშევანგები სეირნობდნენ… იქ გავიზარდე, მეჩვენებოდა, რომ ყველგან ასე უნდა ყოფილიყო. როცა იქიდან წამოვედით, მხოლოდ მაშინ მივხვდი, რომ ეს არის უნიკალური ქვეყანა, რომ იქ ცხოვრობს სტუმართმოყვარე ხალხი, რომელსაც ერთმანეთის დაპატიჟება უყვარს. ჩვენ ვცხოვრობდით ეზოში, სადაც მეზობლები იკრიბებოდნენ და ლოტოს თამაშობდნენ”, -ამბობს არახამია.
90-იანი წლებში, აფხაზეთის ომის შემდეგ, ოჯახი საცხოვრებლად თბილისში გადავიდა. ქართულ სკოლაში ისწავლა, თუმცა ქართული ენა კარგად არ იცის. “მაშინ ვცდილობდი მესწავლა და კარგადაც ვსწავლობდი. საერთოდ, სკოლა ოქროს მედლით დავამთავრე”, -არახამიას თბილისში ახლო ნათესავები ჰყავს.
სკოლა უკვე უკრაინაში დაამთავრა და უმაღლესი განათლებაც უკრაინის ევროპულ უნივერსიტეტში მიიღო. მოგვიანებით, ის კომპანია Template Monster-ის უკრაინის ფილიალის დირექტორი და უკრაინის არმიის მხარდამჭერი გახდა.
ძალიან მალე კი დავით არახამია შესყიდვების საკითხებში თავდაცვის მინისტრის სრულუფლებიან წარმომადგენლად დაინიშნა;
დავით არახამია ამბობს , რომ მიხეილ სააკაშვილთან თავად მივიდა
“თავად მოვძებნე და მივედი მასთან, რადგან საქართველოში ყოფნისას, ის ცვლილებები დავინახე, რომელთა გატარებაც დაიწყო და ვიფიქრე, რომ მაგარი იქნებოდა, რომ ეს უკრაინაშიც გვქონოდა. ასე რაღაცნაირად დავმეგობრდით…” – ამბობს არახამია.
რა შეეხება “ბრაუნს”, დავით არახამიას თქმით, მისი გვარი ინგლისურად საკმაოდ რთულად ჟღერს, ამიტომ გადაწყვიტა იოლი გამოსავალი ეპოვნა ისე, როგორც ეს ამერიკაშია მიღებული… ერთ დღესაც სახლში დაბრუნებულმა “ბრაუნის” ფირმის საპარსი აღმოაჩინა და ექსპრომტად გადაწყვიტა, რომ ეს მისი ფრევდონიმი იქნებოდა.
უკრაინული მედიის ცნობით, ბევრ სხვა საქმესთან ერთად მის სახელს უკავშირდება დრეს-კოდთან დაკავშირებული ცვლილებები, არახამია სამსახურში “შორტებითა და ნოუთბუქით სიარულის” მომხრეა…
შოკისმომგვრელი ჩაცმულობით მივიდა იგი რუსებთან მოლაპარაკებაზე, რითაც ხაზი გაუსვა თავის შინაგან თავისუფლებას და დამოკიდებულებას ძალის ენაზეე მოლაპარაკე მტრისადმი.
დათო არახამიას 6 შვილი ყავს