უკრაინელი სამხედრო ექსპერტი, წარსულში რეაქტიული არტილერიის ოფიცერი ოლეგ ჟდანოვი მის ხელთ არსებული ინფორმაციის საფუძველზე იმ ბლიცკრიგზე საუბრობს, რომელიც ვლ. პუტინს უკრაინაში არ გამოუვიდა და იმასაც პროგნოზირებს, რა ნაბიჯები დარჩა და რა შეიძლება აირჩიოს რუსეთმა.
“ვლადიმირ პუტინი გეგმავდა ბლიცკრიგს, რაც არ გამოუვიდა. ამ დროისთვის რუსეთმა ამოწურა იმ დაჯგუფებების რესურსი (ხაზს ვუსვამ, მთელი შეიარაღებული ძალების კი არა, მხოლოდ კონკრეტული დაჯგუფებების), რომლებიც უკრაინაში შეიყვანა. მას სჭირდება დრო, რათა ძალების გადაჯგუფება მოახდინოს. ამიტომაც წამოიწყო მოლაპარაკების პროცესი. ჩვენთვის ცნობილია, რომ ახლა ბელორუსის მთელ ტერიტორიაზე მიმდინარეობს შეიარაღებული ძალების ახალი ნაწილების გადასროლა უკრაინისკენ. ეს იქნება კიევზე მეორე შტურმის დაწყება. მაგრამ ჩვენ ყველაფერი ეს, რაც ახლა ხდება, გათვლილი გვქონდა და ამას მომზადებული შევხვდით.”, – უკრაინელი სამხედრო ექსპერტი, რეაქტიული არტილერიის ოფიცერი, ოლეგ ჟდანოვი.
“საქმე ის გახლავთ, რომ ვლადიმირ პუტინმა ტაქტიკა შეცვალა. ის გეგმა, რომელიც ბლიცკრიგზე იყო დამყარებული, რუსეთს ჩვენ ჩავუშალეთ: მათი გეგმა იყო სამი მხრიდან შეტევა – აეღოთ დონეცკისა და ლუგანსკის ოლქები ჩვენი ადმინისტრაციული საზღვრების გარღვევით და შედეგად მიეღოთ კიევის კაპიტულაცია. ჩვენ გავუძელით იმ 96 საათის განმავლობაში, რა დროზეც გათვლილი იყო ეს ოპერაცია. ამის შემდეგ, ჩვენს ხელთ არსებული ინფორმაციით, ვლადიმირ პუტინმა გასცა ბრძანება, არ დაინდონ მშვიდობიანი მოსახლეობა და სწორედ ამითაა გამოწვეული ის დამანგრეველი შედეგები დღეს, რასაც ჩვენ ვიმკით”, – აცხადებს ოპოზიციური ტელეარხის “ნასტოიაშეე ვრემიას” ეთერში სამხედრო ექსპერტი ოლეგ ჟდანოვი.