საქართველოში უკრაინის საელჩოს მიერ ორგანიზებული, ქართველი მოხალისეების გაგზავნა უკრაინაში ამ დრომდე ვერ ხერხდება. მიზეზი ისაა, რომ სავარაუდოდ, ქართულმა მხარემ უარი უთხრა თბილისში დაჯდომაზე თვითმფრინავს, რომლითაც მოხალისეები უნდა გადაეყვანათ.
ანტისაოკუპაციო მოძრაობის ლიდერი დავით ქაცარავა ფორმულასთან ამბობს, რომ სწორედ საქართველოს მთავრობამ არ შემოუშვა ბორტი, რომელსაც უკრაინაში მოხალისეები უნდა წაეყვანა.
“ამ წუთას გავიგე, რომ ჩვენმა მთავრობამ დაბლოკა უკრაინული ბორტის შემოსვლა, რომელმაც უნდა წაიყვანოს მოხალისეები უკრაინაში. ეს არის სამარცხვინო საქციელი. ეს არის მთავრობის ლაჩრული, მოღალატეობრივი და კოლაბორაციონისტული გადაწყვეტილება”, – ამბობს ქაცარავა.
მისივე განცხადებით, ახლა ალტერნატიული გზებით წასვლას განიხილავენ. შეგახსენებთ, სპეცრეისი უკრაინაში 18:00 საათზე უნდა შემდგარიყო.
სპეცრეისი უკრაინაში – საქართველოდან 80 ადამიანი მოხალისედ მიდის