უკრაინის შინაგან საქმეთა მინისტრის მრჩეველი, ანტონ გერაშენკო თბილისში გამართულ უკრაინის მხარდამჭერ აქციას ეხმაურება.
ის პრემიერმინისტრ ირაკლი ღარიბაშვილს “რუსეთის მარიონეტს” უწოდებს და ამბობს, რომ ქართველ ხალხს სურს, კრემლის წინააღმდეგ სანქციების შემოღება.
“თბილისში უკრაინის მხარდამჭერი მრავალათასიანი მიტინგი გაიმართა. ქართველებს სურთ სანქციების დაწესება რუსეთისა და პუტინის წინააღმდეგ, მაგრამ მათი რუსეთის ფედერაციის პრემიერ-მარიონეტი წინააღმდეგია”, – წერს ანტონ გერაშენკო “ტელეგრამში”.
ცნობისთვის, გუშინ ირაკლი ღარიბაშვილის მიერ უკრაინასთან დაკავშირებით გაკეთებულ განცხადებებს როგორც საქართველოს მოქალაქეების, ასევე უკრაინელებისა და უცხოელი დიპლომატების მხრიდან მწვავე კრიტიკა მოჰყვა.
ჟურნალისტებთან საუბრისას პრემიერმა აღნიშნა, რომ საქართველო უკრაინაში შეჭრის გამო რუსეთისთვის დაწესებულ სანქციებს არ შეუერთდება და ეს გადაწყვეტილება “ეროვნული ინტერესებით” ახსნა. ასევე, თქვა, რომ უკრაინაში ჩასვლას არ აპირებს: “უკრაინაში ჩასვლა ჩასვლისთვის არაფრისმომცემია”.
გარდა ამისა, მან უკრაინის საკითხზე საპარლამენტო ოპოზიციის მიერ მოწვეულ რიგგარეშე სხდომასთან დაკავშირებითაც ისაუბრა, რომელიც მმართველმა გუნდმა ჩაშალა. “რა თქმა უნდა არ მივალ. მე მაქვს ჩემი საქმე, პარლამენტს თავისი საქმე აქვს, ომი უკრაინაში მიმდინარეობს”, – თქვა ღარიბაშვილმა.
ამასთან, პრემიერი ამტკიცებს, რომ “არავითარი საფრთხე საქართველოს არ ემუქრება” და განვითარებული მოვლენების ფონზე, არც უსაფრთხოების საბჭოს სხდომის მოწვევას აპირებს: “პიარით უსაფრთხოების საბჭოს გამართვა და შოუს დადგმა ჩემი ხელწერა არაა, საქმეზე ვფიქრობ”.
ღარიბაშვილის ამ განცხადებებს უკრაინის რადას დეპუტატი, გონჩარენკოც გამოეხმაურა: “არა უშავს ირაკლი. როდესაც ომი მორჩება და ჩვენს ცაზე სამგზავრო თვითმფრინავები იფრენენ, შეგიძლია მერეც არ ჩამოხვიდე”.
გუშინ საღამოს, თბილისის ქუჩებში უკრაინის მხარდასაჭერად ათასობით ადამიანი გამოვიდა. მათ მეგობარი ქვეყნის მიმართ სოლიდარობა გამოხატეს და განაცხადეს, რომ პრემიერ ღარიბაშვილის მიერ გაკეთებული განცხადებები მათ პოზიციას არ გამოხატავს.