გამთენიისას რუსეთის სამხედრო ნაწილებმა გადაკვეთეს რუსეთ-უკრაინის სახელმწიფო საზღვარი, საჯარისო ნაწილები უკრაინაში შეიჭრნენ ასევე ბელორუსიდან.
სამხედრო კოლონა უკრაინაში ადილობრივი დროით 6:48 საათზე შევიდა. კიევში სირენები ჩაირთო, ვიდეო, სადაც გამაფრთხილებელი სირენების ხმა ისმის, სოციალურ ქსელებში ვრცელდება. მოსახლეობა ცდილობს, უკრაინის დედაქალაქი დატოვოს. ქალაქში ამ ეტაპზე პანიკა არ შეინიშნება, მობილიზებულები არიან სამართალდამცველები. მოსახლეობას ურჩევენ თავი შეაფარონ მიწისქვეშა გადასასვლელებს.
რუსეთის პრეზიდენტის განკარგულებით დონეცკისა და ლუგანსკის თვითგამოცხადებულ რესპუბლიკაში რუსული შეიარაღებული ძალების შესვლა დაიწყო. პარალელურად, მედიაში ვრცელდება ინფორმაცია, რომ უკრაინის არაერთ ქალაქსა და დასახლებაში ისმის აფეთქებების ხმა და ხორციელდება სარაკეტო დარტყმები.
გავრცელებული ინფორმაცია ორი რუსული სამხედრო თვითმფრინავის ჩამოგდების შესახებ რუსეთის თავდაცვის სამინისტრომ ოფიციალურად უარყო. უკრაინული მხარის ცნობით კი, ჩამოგდებულია არამარტო სამხედრო თვითმფრინავები, არამედ ვერტმფრენებიც.