უკრაინის შეიარაღებული ძალების მთავარსარდალი, ვალერი ზალუჟნი აცხადებს, რომ 17 თებერვლის საღამოს მონაცემებით, რუსეთის საოკუპაციო ძალებმა ცეცხლის შეწყვეტის ხელშეკრულება 47-ჯერ დაარღვიეს. მათგან 38 შემთხვევაში მინსკის შეთანხმებებით აკრძალული შეიარაღების გამოყენებით.
ოფიციალური ცნობებით, დაშავებულია 2 მშვიდობიანი მოქალაქე. გენერალი განცხადებაში აღნიშნავს, რომ დეზინფორმაციისა და პროპაგანდის გამოყენებით, რუსეთი უკრაინას მშვიდობიანი მოსახლეობისთვის ცეცხლის გახსნაში ადანაშაულებს.
“ოფიცილური განცხადებით: უკრაინის შეარაღებული ძალები სტაბილურად იცავენ მინსკის შეთანხმებას და საერთაშორისო ჰუმანიტარული სამართლის ნორმებს და არ გეგმავენ შეტევით ოპერაციებს ან მშვიდობიანი მოსახლეობის წინააღმდეგ ცეცხლის გახსნას. ჩვენ მოქმედებებს თავდაცვითი ხასიათი აქვს”, – აღნიშნულია განცხადებაში.
მისივე თქმით, ნებისმიერი ზიანი, რომელიც შეიძლება ადამიანებს ან ინფრასტრუქტურულ ობიექტებს მიადგეთ დროებით ოკუპირებულ ტერიტორიებზე, პროვოკაციაა. მთავარსარდალი მომხდარზე პასუხისმგებლობას რუსეთს აკისრებს.
უკრაინის გარშემო სიტუაცია კვლავ დაძაბულია. 17 თებერვალს სტანიცა ლუგანსკში საოკუპაციო ძალებმა საბავშვო ბაღი დაბომბეს. არსებული ცნობებით, შენობაში ბავშვები იმყოფებოდნენ, დაშავებულია 2 ზრდასრული პირი.
აშშ-ში ამბობენ, რომ რუსეთი მსგავსი ქმედებებით ცდილობს, თავდასხმის საბაბი შექმნას. მიუხედავად იმისა, რომ მოსკოვი უკრაინაში შეჭრაზე ინფორმაციას უარყოფს, დასავლეთს ომის მოლოდინი აქვს. რუსეთის და ბელარუსის სამხედრო წვრთნების დასკვნითი ღონისძიება 19 თებერვალსაა დაგეგმილი. ამ დრომდე უკრაინის ოკუპირებული ტერიტორიების გასწვრივ რუსული სამხედრო ნაწილებია მობილიზებული.