საქართველოში ევროკავშირის ელჩის, კარლ ჰარცელის განცხადებით, მნიშვნელოვანია ხელისუფლებამ მიხეილ სააკაშვილთან მიმართებაში სამედიცინო რჩევები გაითვალისწინოს. მისივე თქმით, ევროკავშირი მოვლენათა განვითარებას აკვირდება.
“ევროკავშირი ყურადღებით აკვირდება მოვლენათა განვითარებას და არაერთხელ გამოვთქვით ჩვენი მოსაზრება ამასთან დაკავშირებით. მნიშვნელოვანია, ვიყოთ დარწმუნებულები, რომ ბატონი სააკაშვილის ჯანმრთელობასთან დაკავშირებით შესაბამისი ზომები იქნას მიღებული, ამისთვის ყველაზე მნიშვნელოვანია სამედიცინო რჩევები და ამ რჩევების გათვალისწინება ხელისუფლების მიერ”, – თქვა კარლ ჰარცელმა.
ცნობისთვის, რუსთავის ციხეში გადაყვანის შემდეგ მიხეილ სააკაშვილთან მის პირად ექიმს არ უშვებენ. მიხეილ სააკაშვილმა ციხის საკანში მედიკოსების დაშვება სასამართლო პროცესზეც მოითხოვა, თუმცა მოსამართლისგანაც უარი მიიღო. მან ჯანმრთელობის გაუარესებაზე სრული პასუხისმგებლობა ბიძინა ივანიშვილს დააკისრა.