ფრაქცია “ერთიანი ნაციონალური მოძრაობა” ზუგდიდის ბოტანიკურ ბაღში შესვლაზე დაწესებული საფასურის გაუქმებას ითხოვს. ინიციატივა ოპოზიციურმა პარტიამ საკრებულოში უკვე დაარეგისტრირა. ინფორმაციას სოციალურ ქსელში პარლამენტის წევრი და რეგიონული ოფისის ხელმძღვანელი ანა წითლიძე ავრცელებს.
“ზუგდიდის ბოტანიკურ ბაღში, ვიზიტის საფასურის დაწესება მოსახლეობაში უკმაყოფილების მიზეზი გახდა, რასაც მოწმობს სოციალურ ქსელში გამოთქმული აზრები და ჩატარებული საპროტესტო აქციები, სხვადასხვა ასაკისა და სოციალური მდგომარეობის ადამიანების ჩართულობით. აღსანიშნავია ისიც, რომ ბაღი არის ერთადერთი მწვანე ზონა ქალაქში.
მით უმეტეს იმ ფონზე, როდესაც სტატისტიკური მონაცემები თუ ჩვენს მიერ ჩატარებული გამოკითხვები ადასტურებს, რომ ზუგდიდის მოსახლეობის ეკონომიკურ ფინანსური მდგომარეობა გაუარესდა.
ფრაქცია “ერთიანი ნაციონალური მოძრაობა” ინიციატივით შემოვდივართ უახლოეს საკრებულოს სხდომაზე განხილულ იქნას ზუგდიდის ბოტანიკურ ბაღში ვიზიტთან დაკავშირებით დაწესებული გადასახადის საკითხი”, – ნათქვამია ინიციატივაში.
შეგახსენებთ, რომ ზუგდიდის ბოტანიკურ ბაღში შესვლა 1-ლი თებერვლიდან ფასიანი გახდა, რასაც ახალგაზრდებისა და საზოგადოების ნაწილის უკმაყოფილება მოჰყვა. ამ საკითხთან დაკავშირებით აქციები გაიმართა, ზუგდიდის ქუჩებში კი სტენსილები “გააღე ბოტანიკურის შიშკარი” გამოჩნდა.