ფეისბუქის ქართულმა ჯგუფმა “მკითხველთა ლიგა”, სადაც 140.000 ადამიანია გაწევრიანებული და პოპულარობითა და აქტიურობით გამოირჩევა, ბოლო 500 წლის განმავლობაში საუკეთესო ქართველ მმართველად საბჭოთა დიქტატორის სტალინის მარჯვენა ხელი ლავრენტი ბერია დაასახელა, რომელსაც საქართველოში ათეულობით ათასი პატრიოტის დაპატიმრება, გადასახლება და დახვრეტა უკავშირდება.
გამოკითხულთა აბსოლუტურმა უმრავლესობამ ხმა სწორედ ლავრენტი ბერიას მისცა, ხოლო ჯგუფის ადმინისტრატორმა, შემაჯამებელ პოსტში ბერიას “უპირობო გენიოსი” უწოდა. იმავე პოსტში წერია, რომ ლავრენტი ბერიამ დახვრეტას გადაარჩინა კონსტანტინე გამსახურდია და “სხვა პატრიოტები”.