“მხარი დაუჭირე უკრაინას!” – ამ სახელწოდებით თბილისში, პარლამენტის შენობასთან უკრაინელი ხალხის მხარდამჭერი აქცია მიმდინარეობს. საკანონმდებლო ორგანოსთან პოლიტიკოსები, სამოქალაქო აქტივისტები და რიგითი მოქალაქეები არიან შეკრებილი.
აქციის პარალელურად, ადგილზე სპეციალური კუთხეა მოწყობილი, სადაც მოქალაქეები უკრაინის მხარდამჭერ პეტიციას აწერენ ხელს.
როგორც პარტია “დროას” ლიდერმა, ელენე ხოშტარიამ აღნიშნა, ქართველი საზოგადოება მეგობარი ქვეყნის მიმართ სოლიდარულია და მოქალაქეებს კარგად ესმით, რომ რუსეთი საფრთხეს უქმნის არა მხოლოდ უკრაინის, არამედ საქართველოს უსაფრთხოებას.
“ჩვენ ვნახეთ, რომ ქართული საზოგადოება არის გამსჭვალული სოლიდარობით, ესმის, რომ ეს საფრთხე ჩვენს გვემუქრება და ამ დროს შენი მთავრობა არ წარმოადგენს, არა ამბობს, რომ დიახ, რუსეთი არის დღეს უკრაინის, ჩვენი უსაფრთხოების პრობლემა და მსოფლიოს უსაფრთხოების პრობლემა. მით უმეტეს მთელი მსოფლიო მობილიზებულია, რომ დაიცვან ჩვენნაირი ქვეყნები და ამ დროს მთავრობის დუმილი არის ისტორიული სირცხვილი და გარდა ამისა, პრაგმატულად არ დაცვა ჩვენი ინტერესების”, – თქვა ელენე ხოშტარიამ.
მეგობარი ქვეყნის მხარდამჭერ მანიფესტს სულ უფრო მეტი ადამიანი უერთდება. “ქართული ოცნების” მიერ შემუშავებული რეზოლუციისგან განსხვავებით, მანიფესტში საზოგადოება რუსეთის სამხედრო ესკალაციას გმობს და ერთგული რჩება ნატოს 2008 წლის ბუქარესტის სამიტის გადაწყვეტილების, რის მიხედვითაც საქართველო და უკრაინა აუცილებლად გახდებიან ჩრდილო ატლანტიკური ალიანსის წევრები.
პეტიციაზე ხელის მოწერა შესაძლებელია ონლაინ რეჟიმშიც.