უკრაინაში რუსეთის შეჭრის საფრთხის ზრდის პარალელურად, ქართული სოციალური ქსელის პოლიტიკური ნაწილი ხშირად იხსენებს იმ თანადგომას, რომელიც უკრაინამ საქართველოს რუსეთ-საქართველოს ომის აფხაზეთის მონაკვეთში და მისი დასრულების შემდეგ გაუწია.
ცნობილია, რომ უკრაინელი ნაციონალისტები, “უნა-უნსოს” მეომრები და სხვა მოხალისეები, აფხაზეთში რუსეთთან ომის დროს ჩვენს მხარეს იბრძოდნენ. აფხაზეთში 7 უკრაინელი მებრძოლი დაიღუპა.
ამავე პერიოდში, უკრაინა ერთადერთი სახელმწიფო იყო, რომელმაც დაიწყო აფხაზეთიდან ქართველი დევნილების ევაკუაციის სპეცოპერაცია, 1993 წლის 11 ოქტომბერს.
17 ვერტმფრენი,
291 აფრენა და გადარჩენილი
7.643 ქართველი. იყო შემთხვევა, როდესაც ერთი უკრაინელი მფრინავი, ზედიზედ 8 რეისის განმავლობაში არ გადმოსულა პილოტის კაბინიდან.
ბევრმა არც ის იცის, რომ დევნილები უკრაინულ გემებსაც გადაჰყავდა.
ცალკე მუშაობდა ვერტმფრენების ჰუმანიტარული ჯგუფი, რომლებიც უღელტეხილებზე ფეხით მიმავალი დევნილებისთვის, გზის განაპირას კონსერვის ქილებსა და სხვადასხვა საკვებს ყრიდნენ, რათა შიმშილისგან არ დახოცილიყვნენ…