კოლექტიური უასაფრთხოების ხელშეკრულების ორგანიზაციის (CSTO) სამხედროებმა დაასრულეს გასვლა ყაზახეთიდან, სადაც მათ იანვრის დასაწყისში ქვეყნის მთავრობამ მოუხმო სისხლიანი საპროტესტო გამოსვლების დროს ქვეყნის უდიდეს ქალაქში, ალმათიში.

ყაზახეთში რუსეთის ელჩმა, ალექსეი ბოროდავკინმა და ყაზახეთში CSTO-ის მისიის ხელმძღვანელმა, გენერალმა ანდრეი სერდიუკოვმა 19 იანვარს განაცხადეს, რომ “სამშვიდობო ოპერაცია” დასრულებულია და ყაზახეთი დატოვა ორგანიზაციის “ყველა” სამხედრომ.

ყაზახეთში გაგზავნილი იყო რუსი, სომეხი, ყირგიზი და ტაჯიკი სამხედროებისგან შემდგარი დანაყოფი, მას მერე, რაც საწვავის ფასების ზრდით გამოწვეული, მცირემასშტაბიანი საპროტესტო გამოსვლები გადაიზარდა მასობრივ და ძალადობრივ ანტისამთავრობო დემონსტრაციებში. ყაზახეთის პრეზიდენტი, ყასიმ-ჟომარტ ტოყაევი იმ დღეებში ამბობდა, რომ ალმათიზე შეტევა განახორციელა “უცხოეთში გაწვრთნილმა 20,000-მა ტერორისტმა”, და მან CSTO-ის ძალებს ქვეყანაში ვითარების “სტაბილიზაციის” მიზნით მოუხმო. ქვეყანაში მყოფი, ან საპროტესტო გამოსვლების მხარდამჭერი “ტერორისტების” შესახებ ტოყაევს მტკიცებულებები არ წარმოუდგენია.

ყაზახეთის ოფიციალური პირების განცხადებით, დემონსტრაციების დროს დაიღუპა 227-მდე ადამიანი, მათ შორის 19 სამართალდამცველი. ადამიანის უფლებების დამცველები ვარაუდობენ, რომ მსხვერპლის რეალური მონაცემი შესაძლოა გაცილებით მაღალი იყოს, რადგან მღელვარების შემდეგ ბევრი ადამიანი დაკარგული რჩება.

19 იანვარს ალმათის მესვეურებმა ქალაქში გააძლიერეს უსაფრთხოების ზომები, იმ ფონზე, როცა უცხოეთში მყოფმა ოპოზიციონერმა პოლიტიკოსმა, მუხთარ აბლიაზოვმა, ყაზახეთის მოქალაქეებს ამ დღეს ალმათიში და სხვა ქალაქებში საპროტესტო აქციების გამართვისკენ მოუწოდა.