ყაზახეთში მთავრობა გადადგა. ყაზახეთის პრეზიდენტმა, ყასიმ-ჟომარტ ტოკაევმა მიიღო მთავრობის გადადგომის გადაწყვეტილება ოთხშაბათს, მას შემდეგ რაც საწვავის ფასის მატების გამო ქვეყანაში მასობრივი საპროტესტო აქციები გაიმართა.
პროტესტი გაზის გაძვირების გამო 2 იანვრიდან დაიწყო. გუშინ მასობრივი აქციის დასაშლელად პოლიციამ ცრემლსადენი გაზი და ხმოვანი ყუმბარები გამოიყენა. ალმათის მთავარ მოედანზე და მიმდებარე რაიონებში შეტაკებები საათობით გრძელდებოდა.
პრეზიდენტმა ოთხშაბათს დილით გამოაცხადა საგანგებო მდგომარეობა ალმათიში და ნავთობის მწარმოებელ დასავლეთ პროვინციაში და განაცხადა, რომ ძალადობის უკან შიდა და უცხოელი პროვოკატორები დგანან.
პრემიერ-მინისტრის მოვალეობას დროებით პირველი ვიცეპრემიერი ალიხან სმაილოვი შეასრულებს, ხოლო გადამდგარი მინისტრები მოვალეობის შემსრულებლად დარჩებიან მთავრობის ახალი შემადგენლობის დამტკიცებამდე.