დღეს მოშიმშილეები მესამე პრეზიდენტის მიხეილ სააკაშვილის დედა გიული ალასანიამ მოინახულა. მან ადამიანებს, რომელთაც ჯანმრთელობის პრობლემები აქვთ, შიმშილობის შეწყვეტისაკენ მოუწოდა.
“ველაპარაკე ყველას, სხვადასხვანაირია მათი ჯანმრთელობს მდგომარეობა, მე აქ შევხვდი ადამიანს, რომელსაც შუნტირება აქვს გაკეთებული, 4 შუნტი აქვს დადებული და არაფრით არ შეიძლება მისი შიმშილობა. ექიმები ეუბნებიან, უკრძალავენ და ფეხს არ იცვლის, კატეგორიულად არ მიდის. აქ სხვებიც არიან მეტ-ნაკლებად ჯანმრთელობა არ უწყობთ ხელს, მაგრამ კატეგორიულად არსად არ მიდიან და აგრძელებენ ამ შიმშილობას, ძალიან ვღელავ”, – განაცხადა გიული ალასანიამ.
“ერთიანი ნაციონალური მოძრაობის” ოფისთან პატიმრობაში მყოფი მესამე პრეზიდენტის გათავისუფლების მოთხოვნით მეშვიდე დღეა მასობრივი შიმშილობის აქცია მიმდინარეობს.
მოშიმშილეთა ნაწილს ქრონიკული დაავადებები აქვს და მათი შიმშილობა საფრთხისშემცველია, ექიმების რეკომენდაციების მიუხედავად კი, ისინი საპროტესტო აქციას არ ეწყვეტენ. შედეგად 10 ადამიანს სასწრაფო სამედიცინო დახმარება დასჭირდა , ორი მათგანი ამ დრომდე სამედიცინო დაწესებულებაში რჩება.