დღეს ეკატერინე ტიკარაძეს ჯანდაცვის მინისტრის პოსტზე ბოლო სამუშაო დღე აქვს.
ამ წუთებში გადამდგარი მინისტრი სასტუმრო “ბალტმორში” პრეზენტაციას მართავს და თავისი საქმიანობის პერიოდს აჯამებს.
ჯანდაცვის მინისტრის, ეკატერინე ტიკარაძის თქმით, მას ყოველთვის ჰქონდა იმის მოლოდინი, რომ საზოგადოება იქნებოდა გაცილებით უფრო დამნდობი და პარტნიორული.
“ახლა, ალბათ, უკვე მაქვს იმის უფლება, რომ ვთქვა, რომ ჩემი მოლოდინი ყოველთვის რატომღაც უფრო ის იყო, რომ ყველა, საზოგადოება მათ შორის, იქნებოდა გაცილებით უფრო დამნდობი და პარტნიორული, ვიდრე ისეთი, რასაც ჩვენ ვხედავდით, ვინაიდან სამინისტროს თითოეული თანამშრომელი ძალიან ხშირად იყო ბულინგის მსხვერპლი და ამას არ აკლებდნენ არც ბატონ პაატას, ბატონ ამირანს, ქალბატონი თამარიც ხშირად იყო მსხვერპლი.
ბატონი თენგიზი არ არის სამინისტროს თანამშრომელი, მაგრამ შეიძლება, ყველაზე მეტი თანამშრომელი ბატონი თენგიზი იყოს, ვინაიდან ამ მთელი პანდემიის პირობებში ის არის იმ დროშის მატარებელი, რასაც პაციენტის დაცვა ჰქვია და არ ერიდებოდნენ არც მის ასაკს, არც მის სტატუსს, არც მის კვალიფიკაციას და იცით, თუ რა გვაქვს გამოვლილი”, — განაცხადა მინისტრმა შემაჯამებელი ანგარიშის წარდგენისას.
შემაჯამებელ შეხედრაზე ტიკარაძემ ექიმები, კლინიკების ხელმძღვანელები და დაავადებათა ეროვნული ცენტრის თანამშრომლები მიიწვია. პრეზენტაციაზე ამ დრომდე არ გამოჩენილან “ქართული ოცნების” დეპუტატები.