თბილისის მერის მოადგილემ, ირაკლი ხმალაძემ განაცხადა, რომ პარკირების გადასახადთან დაკავშირებით ცვლილებები არ იგეგმება. ზონალურ-საათობრივი პარკირების ფასი კვლავინდებურად 1 ლარი იქნება, წლიური სააბონენტო გადასახადი კი – 50 ლარი.
ირაკლი ხმალაძის განმარტებით, მერია ორგანიზაციებისა და ბიზნესსექტორისთვის დამატებითი პაკეტების შეთავაზებას გეგმავს. მათ შორის იქნება წლიური 800-ლარიანი სააბონენტო გადასახადი, რომელიც მფლობელს ათავისუფლებს საათობრივი საფასურისგან. „რამდენიმე პაკეტი წარვადგინეთ საკრებულოში. ეს არის ერთთვიანი, ერთწლიანი, 6 თვიანი და 1 დღიანი, რომლითაც შეუძლიათ, რომ ისარგებლონ მსურველებმა. ეს არ არის სავალდებულო. ყველა არსებული პირობა, ოფცია და ფასები, რომელიც დღემდე მოქმედებდა, ისევ ისე შენარჩუნდება“ – განაცხადა ირაკლი ხმალაძემ.
დღეს მედიით გავრცელდა ინფორმაცია, რომ თბილისში პარკირების საფასურის გადახდის წესის ცვლილება იგეგმებოდა და პარკირებაზეც, საზოგადოებრივი ტრანსპორტის მსგავსად, აბონემენტები შეიქმნებოდა.