მიხეილ სააკაშვილი: “გიგი 2008 წლის ომის გმირია, დარწმუნებული ვარ, ძალიან სწრაფად გათავისუფლდება… გერმანიის სასამართლო მურუსიძის კანტორა არავის ეგონოს”

0
134

“გიგი 2008 წლის ომის გმირია, დარწმუნებული ვარ, ძალიან სწრაფად გათავისუფლდება… გერმანიის სასამართლო მურუსიძის კანტორა არავის ეგონოს” – ამის შესახებ საქართველოს მესამე პრეზიდენტი მიხეილ სააკაშვილი გიგი კალანდაძესთან დაკავშირებით საუბრობს. გენერალი კალანდაძის დაკავებას ის გორის სამხედრო ჰოსპიტლიდან ეხმაურება. 

მიხეილ სააკაშვილის წერილი სრულად:

“საქართველოს ხელისუფლების მოთხოვნით, ბერლინში დააკავეს საქართველოს გენშტაბის ყოფილი უფროსი გიგი კალანდაძე. ის არის 2008 წლის ომის გმირი. მაშინ მე-4 ბრიგადის ჯგუფმა, რომელსაც ის მეთაურობდა, შეაჩერა რუსეთის ტანკების მოწინავე დამრტყმელი ძალა და ამ ბრძოლის დროს მძიმედ დაიჭრა რუსეთის 58-ე არმიის მეთაური გენერალი ხრულოვი. 

უკრაინაში ომის დაწყებისთანავე გიგი აქტიურად ჩაერთო საბრძოლო მოქმედებებში. მას მნიშვნელოვანი წვლილი აქვს გაღებული მტრის შეტევის შეჩერებაში აღმოსავლეთის ფრონტზე. სწორედ ამის მერე საქმეც აღიძრა. რამდენადაც ვიცი, გენერალი კალანდაძე უკრაინის მოქალაქეა და ასევე მას უკავია თანამდებობა უკრაინის ეროვნულ გვარდიაში. 

სირცხვილია, რომ საქართველოს ხელისუფლება სწორედ რუსეთის მთავარ მტრებს უქმნის პრობლემებს მსოფლიოს მასშტაბით. დარწმუნებული ვარ, გერმანიის პროკურატურა და სასამართლო სწრაფად გაერკვევიან დაკავების მოთხოვნის დაუსაბუთებლობაში და გიგი ძალიან სწრაფად გათავისუფლდება და მას ბოდიშსაც მოუხდიან. გერმანიის სასამართლო მურუსიძის კანტორა არავის ეგონოს. უბრალოდ, საქართველოს ხელისუფლება მორიგ ჯერზე იჭრის თავს!” – წერს მიხეილ სააკაშვილი.

წინა სტატიაგენერალი გიორგი კალანდაძე დაკავებულია
შემდეგი სტატიავაზისუბანში მდებარე საცხოვრებელ სახლში ძლიერი აფეთქება მოხდა, სავარაუდო მიზეზი გაზის გაჟონვაა
ტელეკომპანია ოდიშის საინფორმაციო სამსახური