სამეგრელოს სამ მუნიციპალიტეტში საკრებულოს სხდომები ისევ ჩაიშალა, მათ შორის არის წალენჯიხაც, რომელიც ისევ საკრებულოს თავმჯდომარის გარეშეა.
სხდომის დაწყებამდე პარტია ,,გახარია-საქართველოსთვის” წევრებს თავმჯდომარის წევრობაზე საკუთარი კანდიდატურა უნდა დაესახელებინათ, რომელსაც ოპოზიციური პარტიები მხარს დაუჭერდნენ, თუმცა მოულოდნელად, გადაწყვეტილება შეცვალეს.
წალენჯიხა ერთადერთი მუნიციპალიტეტია, სადაც მერის არჩევნებში ოპოზიციის კანდიდატმა გაიმარჯვა. მუნიციპალიტეტში ამ დრომდე არაა არჩეული საკრებულოს თავმჯდომარე. საკრებულოში კი 27 წევრია, საიდანაც 11-11 წევრი ჰყავთ ,,ქართულ ოცნებასა” და ,,ერთიან ნაციონალურ მოძრაობას”, ,,გახარია-საქართველოსთვის” 3 მანდატით არის წარმოდგენილი, ერთი წევრი არის „ლელოდან“. ხოლო ერთი დეპუტატი დამოუკიდებელი წევრის სტატუსით არის საკრებულოში, მან რამდენიმე კვირის წინ დატოვა გახარიას პარტია.