რუსეთის საგარეო საქმეთა სამინისტრომ განაცხადა რომ ადეკვატურ პასუხს გასცემს თავისი ორი დიპლომატის გერმანიიდან გაძევებას.
ბერლინის სასამართლომ 15 დეკემბერს სამუდამო პატიმრობა მიუსაჯა რუს ვადიმ კრასიკოვს, რომელიც 019 წლის 23 აგვისტოს ყალბი საბუთებით ჩავიდა ბერლინში და ტიერგარტენის პარკში ზელიმხან ხანგოშვილს სასიკვდილოდ ესროლა.
რუსეთის საელჩომ სასამართლოს განაჩენი გააკრიტიკა და განაცხადა, რომ საქმე ეხება მიკერძოებულ, პოლიტიკურად მოტივირებულ გადაწყვეტილებას, რომელიც კიდევ უფრო ართულებს რუსეთსა და გერმანიას შორის ისედაც დაძაბულ ურთიერთობებს.
გამოცემა The Insider-მა, დამოუკიდებელმა ჯგუფმა Bellingcat-მა და ჟურნალმა Der Spiegel-მა მოახერხეს დაედგინათ, რომ ხანგოშვილის მკვლელი არის ვადიმ კრასიკოვი, რომელიც ფსბ-ს სპეციალურ ქვედანაყოფ „ვიმპელში“ მსახურობდა. როგორც გამომძიებლები აღნიშნავენ, მას ასევე ბრალი მიუძღვის რუსეთში ორი ბიზნესმენის შეკვეთილ მკვლელობებში.
მიმდინარე წლის აგვისტოში ზელიმხან ხანგოშვილის მკვლელის სასამართლო პროცესის ერთ-ერთ უკანასკნელ სხდომაზე გამოვიდა ბრალდების მოწმე, რომელიც ბრალდებულის ახლო ნათესავია. მან არა მხოლოდ ამოიცნო კრასიკოვი, არამედ ჩვენება მისცა იმის შესახებ, რომ ის ადრე რუსეთის ფედერაციის თავდაცვის სამინისტროს დივერსიულ-სადაზვერვო ჯგუფში მსახურობდა.
რუსეთი კატეგორიულად უარყოფს მკვლელობასთან კავშირს. რუსეთის პრეზიდენტმა ვლადიმირ პუტინმა განაცხადა, რომ მოკლული იყო მოსკოვის მეტროში მოწყობილი აფეთქების ერთ-ერთი ორგანიზატორი, მოვიანებთი მას უკავშირებდნენ ბესლანში სკოლის ხელში ჩაგდებას. პუტინის თქმით, ბერლინში მომხდარი მკვლელობა „ბანდიტური გარჩევის“ შედეგი უნდა იყოს.