,,დროას” ლიდერის ელენე ხოშტარიას განცხადებით, პრეზიდენტის საახალწლო მიღებაზე მიწვეულია, იწვიეს, თუმცა წასვლას არ აპირებს. მისი თქმით, არ არის ის რეალობა, რომ ქართულ ოცნებასთან “შამპანურის მიჭახუნება” შეძლოს. ხოშტარიამ განმარტა, რომ მისი ეს გადაწყვეტილება, არ ნიშნავს თავად პროცესზე უარის თქმას, მზად არის, მივიდეს საქმეზე სალაპარაკოდ ნებისმიერ ფორმატში.
“საახალწლო წვეულებაზე ვერ მივალ (ჯერ სახლისთვისაც ვერ მიყიდია ნაძვის ხე). ჯერ ერთი ემოციურად და ფიზიკურად ძალიან გამიჭირდება საახალწლო წვეულებისთვის შესაფერის განწყობაზე ვიყო და იქ ვითომც არაფერი ისე ვიყო. სამწუხაროდ, არ არის ჩვენთან დღეს ის რეალობა, რომ შევძლო შამპანურის მიჭახუნება ოცნების წარმომადგენლებთან. შეუძლებელია ეს შევძლო დაჭერების ფონზე. დღეს თან მთელი დღე სასამართლოა და აქედან, რომ იქ წავიდე უბრალოდ არ შემიძლია. ასევე, პრაგმატულად არასწორი მგონია პოლარიზაციის დაძლევის პროცესი ამ ფორმით მივიღოთ. ეს ჩემთვის თამაში გამოვა”, — წერს ხოშტარია.
ღონისძიებას არ დაესწრება არც ნაციონალური მოძრაობა. ნიკა მელიას განცხადებით, ზურაბიშვილს შეხვდებიან მაშინ, როდესაც განიხილავენ, მის მიერვე დაანონსებულ ინიციატივას.
მიღებას არ დაესწრებიან არც ლელოს ლიდერები მამუკა ხაზარაძე და ბადრი ჯაფარიძე. დღეს, 16 დეკემბერს საქალაქო სასამართლოში მათი საქმის ბოლო სხდომაა.