ანტისაოკუპაციო მოძრაობის ლიდერის, დავით ქაცარავას ინფორმაციით, ოკუპანტების მიერ გატაცებული მამუკა ჩხიკვაძე სასტიკად ნაცემი და ნაწამებია და ცხინვალის იზოლატორში ყავთ დატყვევებული.
“მამუკა ჩხიკვაძე არის სასტიკად ნაცემი და ნაწამები, რაც მოსალოდნელი იყო სამწუხაროდ, თუმცა დადასტურებით ამაზე საუბარი გვიჭირდა, მაგრამ დღეს ეს ინფორმაცია უკვე მივიღეთ და შეგვიძლია ამის გაჟღერება. მე-4 დღეა, ხელისუფლება დუმს, ზუსტად იმიტომ, რომ მათ იცოდნენ ამის შესახებ. ჩვენ დღის ბოლომდე ვაძლევთ ვადას ხელისუფლებას, რომ გააჟღერონ კონკრეტული გეგმა, გვითხრან როდის დაიხსნიან, როდის გამოიყვანენ მამუკა ჩხიკვაძეს, წინააღმდეგ შემთხვევაში, ვაანონსებთ აქციებს, რომელიც “ქოც” ხელისუფლებას და მის რუსულ ბოსებს ძალიან არ მოეწონებათ”, – თქვა დავით ქაცარავამ.
ის ხელისუფლებას ვადას დღის ბოლომდე აძლევს, წინააღმდეგ შემთხვევაში კი აქციებს აანონსებს.
საოკუპაციო რეჟიმის ყოფილი ტყვე, ექიმი ვაჟა გაფრინდაშვილი ამბობს, რომ არ შეიძლება ადამიანი დაისაჯოს იმის გამო, რომ ის თავის ქვეყანას იცავდა და არ შეიძლება სახელმწიფომ ყოფილი თუ მოქმედი ჯარისკაცი გაჭირვების დროს მიატოვოს.
შეგახსენებთ, 12 დეკემბერს რუსეთის საოკუპაციო ძალებმა გორის მუნიციპალიტეტის სოფელ ზემო ნიქოზის მიმდებარედ, ოკუპირებულ ტერიტორიაზე, საქართველოს მოქალაქე უკანონოდ დააკავეს. მას, როგორც ყოფილ ძალოვანს ოკუპანტების ხელში დიდი საფრთხე ემუქრება.