დროულად უნდა განხორციელდეს ყველა ის ინიციატივა, რომელიც ამ დღეებში იქნა გაჟღერებული და ეს პროცესი მალე დაიწყოს – ასეთია მიხელ სააკაშვილის პოზიცია მოლაპარაკებებზე.
მესამე პრეზიდენტი გამოეხმაურა მეუფე იაკობის ქადაგებას, რომელიც ამბობს, რომ შეხვედრა ეკლესიაში უნდა შედგეს.
“მიხეილ სააკაშვილისთვის სასიამოვნო აღმოჩნდა ეკლესიის პოზიცია იმასთან დაკავშირებით, რომ სასურველია შეხვედრა სამ პრეზიდენტს შორის გაიმართოს საპატრიარქოში, თუმცა მას შეუძლებლად მიაჩნია ეს ტექნიკურად განხორციელდეს , ვინაიდან მისი პირობები ყველასთვის ცნობილია. ის არის პატიმრობაში, არ აქვს თავისუფლად გადაადგილების შესაძლებლობა, მან არ იცის, როგორ უნდა მოგვარდეს ეს ტექნიკური დეტალები, თუ ეს მოგვარდება მის გარეშე, ცხადია მას სადაც სთხოვენ შეხვედრას, არანაირი წინაპირობა არ აქვს სხვა, გარდა მზაობისა და გამოთქვამს თანამშრომლობის სურვილს ნებისმიერ გარემოში, ეს იქნება საპატრიარქო, პრეზიდენტის ადმინისტრაცია, გორის ჰოსპიტალი თუ, ნებისმიერი ლოკაცია, ოღონდ დასრულდეს ეს დაპირისპირება, ის მტრობა, რაც დღეს ქვეყანაშია და დაპირისპირებული მხარეები დასხდნენ სასაუბროდ” – ამბობს ეკა ხერხეულიძე, რომელმაც გორის სამხედრო ჰოსპიტალიდან მესამე პრეზიდენტის გზავნილები გამოიტანა.
ხერხეულიძის თქმით, პრეზიდენტი სააკაშვილი მიესალმება 21 დეკემბერს აქციას, რომელიც გუშინ დაანონსდა და ყველას სთხოვს, ვისთვისაც ქვეყნის მომავალი და ბედი მნიშვნელოვანია, აქციაზე მივიდეს.