დღეს მიხეილ სააკაშვილს სახალხო დამცველის ინიციატივით შექმნილი ექსპერტთა ჯგუფის წევრები მოინახულებენ და მისი ჯანმრთელობის მდგომარეობას შეაფასებენ. ისინი უკვე მივიდნენ გორის სამხედრო ჰოსპიტალში და საშვებს ელოდებიან.
მესამე პრეზიდენტს დღეს 7 ექიმი შეხვდება.
“ჩვენი მთავარი ამოცანაა, შევისწავლოთ მიხეილ სააკაშვილის მდგომარეობა, შევადაროთ მის მდგომარეობას გარკვეული პერიოდის წინ. გადავხედოთ იმ მედიკამენტოზურ მკურნალობას, რომელიც მას უტარდება. მართლაც დასუსტებულია, თუ არა როგორც ამბობენ. ერთი დამატებითი ექსპერტი გვყავს, ფსიქიატრი, რადგან ვთვლით, რომ აუცილებელია მისი ფსიქო-ემოციური მდგომარეობის უფრო კომპეტენტური შესწავლა”- განაცხადა სამედიცინო დაწესებულებაში შესვლის წინ ექიმთა ჯგუფის ერთ-ერთმა წევრმა გიორგი გრიგოლიამ.
ცნობისთვის უკვე 1 საათზე მეტია, მიხეილ სააკაშვილთან პირადი ექიმი ნიკოლოზ ყიფშიძე და ცენტრ “ემპათიას” ალტერნატიული კონსილიუმის წევრი, ნევროლოგი ოთარ თოიძე იმყოფებიან.
ცენტრ “ემპათიას” კონსილიუმის მედიკოსმა, ოთარ თოიძემ თქვა, რომ აუცილებელია, მიხეილ სააკაშვილის მკურნალობა გაგრძელდეს მულტიპროფილურ-სპეციალიზებულ დაწესებულებაში, რაც საქართველოში არ არის.
ცნობისთვის, მიხეილ სააკაშვილთან დღესვე დაგეგმილია სახალხო დამცველის, ნინო ლომჯარიას ვიზიტი.