პარტია „დროა“ „ქართული ოცნების“ ოფისთან აქციას გამართავს. ამის შესახებ ინფორმაციას „დროას“ ლიდერი ელენე ხოშტარია ავრცელებს.
ხოშტარიას თქმით, აქციის მთავარი მოთხოვნები აჭარის ავტონომიური რესპუბლიკის თავმჯდომარის, თორნიკე რიჟვაძის გადადგომა, ბათუმის საკრებულოს წევრის „ერთიანი ნაციონალური მოძრაობიდან” ნუგზარ ფუტკარაძის გარდაცვალების მიზეზის გამოძიება და საქმეში მონაწილე პირების დასჯა იქნება.
„თბილისშიც უნდა ამოვიღოთ ხმა!
გადადგეს აჭარის ავტონომიური რესპუბლიკის თავმჯდომარე თორნიკე რიჟვაძე!
სასწრაფოდ გამოიძიონ ნუგზარ ფუტკარაძეზე ზეწოლისა და მუქარის საქმე და მისი გარდაცვალების მიზეზები!
დაისაჯოს ამ საქმეში მონაწილე ყველა პირი!
25 ნოემბერი, 12:00 საათი, ვიკრიბებით „ქართული ოცნების“ ოფისთან (ერეკლე მეორეს მოედანი N3)
„ერთიანი ნაციონალური მოძრაობის“ მიერ გავრცელებული ჩანაწერები ადასტურებს, რომ ხელისუფლებამ და მასთან დაახლოებულმა პირებმა სცადეს ბათუმის საკრებულოს წევრის, ნუგზარ ფუტკარაძის მოსყიდვა და დაშინება. ნუგზარ ფუტკარაძე ამ შემთხვევიდან რამდენიმე დღეში გარდაიცვალა. მისი გარდაცვალების შემდეგ, ოპოზიციამ ბათუმის საკრებულოში უმრავლესობა დაკარგა.
„ქართული ოცნების“ ხელისუფლებამ უნდა იცოდეს, რომ ჩვენ არ გვეშინია, პროტესტი არ შეწყდება და აღარავინ დარჩება მარტო მოძალადე სისტემის წინაშე!“ – წერს ხოშტარია.