ცენტრ “ემპათიას” ექიმთა ჯგუფი საქართველოს მესამე პრეზიდენტის, მიხეილ სააკაშვილის მოსანახულებლად ნებართვას ამ დრომდე ელოდება.
პენიტენციური სამსახური უკვე სამ დღეზე მეტია, ნებართვის გაცემისგან თავს იკავებს, თუმცა “ემპათიას” ხელმძღვანელი მარიამ ჯიშკარიანი ვარაუდობს, რომ სპეციალისტებს, მესამე პრეზიდენტის მონახულების საშუალება დღეს მიეცემათ.
“დიდი ხანია ვსაუბრობ ნეიროდეგენერაციულ ცვლილებებზე, რომელიც მეორადად იწვევს გარკვეულწილად ფსიქოლოგიურ და ფსიქიკურ სიმპტომებს. ძალიან სერიოზული პროცესია როგორც დიაგნოსტიკის, ასევე თერაპიის და მომდევნო რეაბილიტაციის. Pcr ტესტებიც უნდა ჩავიტაროთ და იმის მიხედვით, როდის იქნება პასუხები, ვეცდებით, რომ შევიდეთ და ვეცდებით, ეს მოხდეს დაბრკოლების გარეშე”, – თქვა მარიამ ჯიშკარიანმა.
ცნობისთვის, გორის სამხედრო ჰოსპიტალში ცენტრ “ემპათიას ექსპერტების დაუყოვნებლივ შეშვება მოითხოვა თავად მიხეილ სააკაშვილმაც. ამასთან დაკავშირებით გუშინ განცხადება “მთავარი არხის” გენერალურმა დირექტორმა, მესამე პრეზიდენტის ადვოკატმა ნიკა გვარამიამ გააკეთა.