დღეიდან, 24 ნოემბრიდან გერმანიაში ამოქმედდა ახალი ზომები კორონავირუსის გავრცელების შესაჩერებლად. საზოგადოებრივი ტრანსპორტით მგზავრობა შეუძლიათ მხოლოდ მათ, ვინც აცრილია, კოვიდი გადატანილი აქვს, ან დადგენილი ვადით ტესტირების უარყოფითი პასუხი აქვს. ამ ახალ წესს გერმანიაში 3G-ს უწოდებენ.
თუ მოქალაქე მაკონტროლებელი სამსახურის თანამშრომლებს შესაბამის დოკუმენტს ვერ წარუდგენს, საზოგადოებრივ ტრანსპორტს დაატოვებინებენ. დღეიდან 3G-ს წესი ამოქმედდა ოფისებშიც.
გერმანიის რობერტ კოხის ინსტიტუტის მონაცემებით, ქვეყანაში კორონავირუსით ინფიცირების შემთხვევები მე-17 დღეა იზრდება. ბოლო 24 საათში ვირუსი დაუდასტურდა 66 800-ზე მეტ ადამიანს და 335 გარდაიცვალა. პანდემიის განმავლობაში გერმანიაში დაინფიცრდა 5 მილიონზე მეტი ადამიანი. გარდაცვლილთა რიცხვი 100 000-ს უახლოვდება.