“მოვუწოდებთ საქართველოს ხელისუფლებას, დაუყოვნებლივ გადადგას ნაბიჯები ბატონი სააკაშვილის სამედიცინო საჭიროებების უზრუნველსაყოფად, ამასთან, დაჟინებით მოვუწოდებთ ხელისუფლებას, რომ მოეპყრას მიხეილ სააკაშვილს სამართლიანად და ღირსეულად”, – ამის შესახებ აშშ-ს სახელმწიფო დეპარტამენტის პრესსპიკერმა, ნედ პრაისმა ყოველდღიურ ბრიფინგზე ისაუბრა და ხაზი გაუსვა, რომ ყოფილი პრეზიდენტის პატიმრობის პირობების შესახებ სახალხო დამცველის დღევანდელი განცხადებები შეშფოთებას იწვევს. 

“ჩვენ ყურადღებით ვაკვირდებით პროცესს ყოფილი პრეზიდენტის, მიხეილ სააკაშვილის დაკავების დღიდან”, – აღნიშნა პრაისმა.

“დღევანდელი განცხადების ფონზე, მოვუწოდებთ საქართველოს მთავრობას, დაუყოვნებლივ გადადგას ნაბიჯები ბატონ სააკაშვილის სამედიცინო საჭიროებების უზრუნველყოფისთვის.

ასევე, მოვუწოდებთ საქართველოს მთავრობას, სამართლიანად და ღირსეულად მოეპყრას ბატონ სააკაშვილს, საერთაშორისო სტანდარტებისა და საქართველოს კანონმდებლობის შესაბამისად.

საქართველოს მთავრობის ვალდებულებაა დაიცვას მოქალაქეები შეურაცხყოფისგან, მათ შორის ფსიქიკური ძალადობისგან და გაუწიოს მათ ადეკვატური სამედიცინო დახმარება”, – აღნიშნა აშშ სახდეპის პრესსპიკერმა.