ბოლო დღეებში “ფეისბუქზე” ბევრმა გააზიარა ამ ხანდაზმული კაცის ფოტო, რომელიც ოპოზიციის მიერ ორგანიზებულ თითქმის ყველა საპროტესტო აქციაზე ჩნდება და აქტიურობს.
“დავბერდი და ასეთი მავნებელი მთავრობა არ მახსენდება”, – ამბობდა ვალოდია ნადირაშვილი 6 ნოემბერს, რუსთავის ციხესთან გამართულ აქციაზე.
“ოდიშინიუსმა” გაარკვია, რომ ეს კაცი ვალოდია ნადირაშვილია, რუსთავში, მეგობრობის გამზირზე ცხოვრობს. არც ისე დიდი ხნის წინათ ის პოლიკლინიკაში მეუღლესთან, უსინათლო მაშოსთან ერთად დადიოდა, რომელსაც ხელჩაჭიდებულს დაატარებდა.
ცოლ-ქმარი ერთად დადიოდნენ სამედიცინო დაწესებულებებსა და აფთიაქებში, სადაც მათ ყველა სცნობდა. კვლევებში, გასინჯვაში მათ შეღავათებს უწევდნენ და ხშირად მედიკამენტების თანხას სრულიად უცნობი ადამიანებიც უხდიდნენ.
“ასე ამბობდა, ჩემი მაშოსთვის მინდაო”, – იხსენებს ერთერთი მედიკოსი ვალოდია ნადირაშვილის ვიზიტებსა და აფთიაქებში სიარულს.
მაშო დაახლოებით სამი წლის წინ გარდაიცვალა, რის გამოც ვალოდია ნადირაშვილი ახლა ეულად დადის. როგორც მისი ნაცნობები ამბობენ, ის ეკლესიური ცხოვრებით ცხოვრობს. ვალოდიას და მაშოს ერთი შვილი ჰყავთ.
მათივე თქმით, ვალოდია ნადირაშვილი მაღალი სამოქალაქო პასუხისმგებლობითაც გამოირჩევა – “როგორც კი საქართველოში “ფაიზერი” შემოვიდა, მაშინვე აიცრა”, – ამბობენ ისინი.
