ენმ-ის სამეგრელოს ორგანიზაციის ლიდერი, პარლამენტის წევრი ანა წითლიძე აცხადებს, რომ ზუგდიდში მერობის კანდიდატების ხმებს შორის სხვაობა, ცესკოს მონაცემებით, დაახლოებით 1.200 ხმაა “ოცნების’ კანდიდატის სასარგებლოდ, დაახლოებით ამდენივეა გაბათილებული ბიულეტენების რაოდენობა ზუგდიდში, ამიტომ ჯერ ბრძოლა დასრულებული არ არის, რადგან ოპოზიცია მოითხოვს ყველა უბნის ოქმების ხელახლა გადათვლას და ასევე, გაბათილებული ბიულეტენების გადახედვას.

შეგახსენებთ, სტატიის გამოქვეყნების დროისთვის (02:40), ცესკოს მონაცემებით, ზუგდიდის ოლქში დათვლილია უბნების 94,4%, 109 უბნიდან 103 უბნის მონაცემების მიხედვით, ენმ-ის მერობის კანდიდატმა ანზორ მელიამ მიიღო 24.130 ხმა (48,4%), ხოლო “ოცნების” კანდიდატმა მამუკა წოწერიამ 25.707 ხმა (51,5%).

“არაფრის დათმობას არ ვაპირებთ, ჩვენი ბრძოლა ჯერაც წინაა და იმ პირობებში, როცა საქართველოს მესამე პრეზიდენტი მიხეილ სააკაშვილი ციხეში შიმშილობს, ჩვენი და იმ მოქალაქეების, რომლებიც მოატყუეს, უფლებაა, რომ მშვიდად, წყნარად, გამოვიდეს და გააპროტესტოს ეს მიტაცებული არჩევნები ქუჩაში”, – თქვა ანა წითლიძემ “მთავარი არხის” ეთერში, ნიკა გვარამიას საგანგებო ეთერში.