“ქართული ოცნების” თავმჯდომარე ირაკლი კობახიძე აცხადებს, რომ მათ ხელთ არსებული ინფორმაციით, მმართველი პარტიის კანდიდატები მყარად იგებენ 20-დან 18 მუნიციპალიტეტში. მისი თქმით, არსებობს “პრაქტიკული და თეორიული შანსი, რომ ორ მუნიციპალიტეტში ბოროტებამ გაიმარჯვოს”, თუმცა, ირაკლი კობახიძე ამ ორ მუნიციპალიტეტს არ ასახელებს.

“არსებული მონაცემებით, უკვე თამამად შეგვიძლია ვთქვათ, რომ ჩვენი კანდიდატები მყარად იგებენ არჩევნებს 20-დან 18 მუნიციპალიტეტში. „ნაცმოძრაობის” კანდიდატები 2 მუნიციპალიტეტში არიან ახლოს 50%-იან ზღვართან, ანუ ბოროტებას თეორიული და პრაქტიკული შანსი აქვს გაიმარჯვოს, შესაბამისად, საჭიროა ამომრჩევლის მაქსიმალური აქტიურობა, რათა ბოროტებამ არც ერთ მუნიციპალიტეტში არ გაიმარჯვოს”, – აცხადებს ირაკლი კობახიძე.

შეგახსენებთ, დღეს, 30 ოქტომბერს ადგილობრივი თვითმმართველობის არჩევნების მეორე ტური საქართველოს 20 ოლქში ტარდება. ამ ოლქებში შედის ხუთივე დიდი ქალაქი და ცალკეული მუნიციპალიტეტები.