ცოტა ხნის წინ თბილისიდან ზუგდიდისაკენ მიმავალი ოპოზიციის მხარდამჭერი აიყვანეს. ციხის ყოფილ უფროსს, თადარიგის ოფიცერს ამირან ჯანაშიას გზა აბაშაში გადაუკეტეს და იქ დააკავეს.
ჯანაშია სოფელ რუხიდანაა, სადაც ოპოზიციამ ,,ქართულ ოცნებას” არჩევნები 500 ხმით მოუგო.
პოლიციელებმა ჯანაშიას კუთვნილ ავტომობილის ჩხრეკისას ცეცხლსასროლი იარაღი იპოვეს და ამჟამად ფოთის პოლიციის განყოფილებაში დაკითხვაზე ჰყავთ გადაყვანილი.
,,ნაცმოძრაობის” წევრმა, ლევან ხაბეიშვილმა, ცოტა ხნის წინ სპეციალური ბრიფინგი გამართა, სადაც განაცხადა, რომ ოპოზიციის მხარდამჭერ ამირან ჯანაშიას სახლში შეუვარდნენ და იარაღი ჩაუდეს.
„ერთიანი ნაციონალური მოძრაობის“ წევრის, პარლამენტარ ანა წითლიძის განცხადებით, ამირან ჯანაშია ის ყოფილი ძალოვანია, რომელიც ოპოზიციას 2 ოქტომბერს არჩევნების გაყალბების წინააღმდეგ ეხმარებოდა. ის ციხის ყოფილი უფროსია. „სენაკის გზაზე დააკავეს, თბილისიდან მოდიოდა. მას ჩაუდეს იარაღი და ეს რომ მოსალოდნელი იყო, ამაზე მან ჯერ კიდევ მანამდე დაწერა „ფეისბუკ”-გვერდზე და ჩვენც ვამბობდით ამას“, – განაცხადა ანა წითლიძემ.
„ერთიან ნაციონალურ მოძრაობაში“ აცხადებენ, რომ მათი პარტიის მხარდამჭერ ყოფილ სამართალდამცავებს პოლიტიკური ნიშნით დევნის ხელისუფლება.