პრეზიდენტი სააკაშვილი უარს ამბობს შიმშილობასთან დაკავშირებულ მკურნალობასა და შემოწმებებზე.
“ამ წუთიდან უარს ვამბობ შიმშილობასთან დაკავშირებულ ყველანაირ მკურნალობაზე, ანალიზებსა, რეანიმობილის ბრიგადების მომსახურებასა და შემოწმებებზე. მხოლოდ მივიღებ იმ წამლებს, რომლებიც შიმშილობას არ უკავშირდება, სანამ შეხვედრების ოთახს არ დაუბრუნებთ პირვანდელ სახეს და არ მომეცემა ჩემი პროცესუალური უფლებებით სარგებლობის საშუალება”, – ნათქვამია სააკაშვილის განცხადებაში, რომლითაც მან მე-12 ციხის, ივანიშვილის დილეგის უფროსს ზურაბ მოდებაძეს, მიმართა.
საქართველოს მესამე პრეზიდენტის განცხადება ჟურნალისტებთან ადვოკატმა, დიმიტრი საძაგლიშვილმა წაიკითხა
დილით სააკაშვილის ციხეში მონახულების შემდეგ ადვოკატმა დიმიტრი საძაგლიშვილმა განაცხადა, რომ ციხის ადმინისტრაციამ მიხეილ სააკაშვილთან შეხვედრის ოთახში პატიმარსა და მნახველს შორის ბარიერი მთლიანად ამოაშენა, რითაც პირდაპირი კომუნიკაციის საშუალება წაერთვათ. აქამდე ისინი ახერხებდნენ ბარიერში ერთმანეთისთვის წერილების გადაცემას და ასე კომუნიკაციას, რითაც კონფიდენციალურობას ინარჩუნებდნენ.