წალენჯიხის მუნიციპალიტეტის ადმინისტრაციულ ერთეულებში, გზებზე, მოსაცდელებზე და ხიდებთან, წარწერა “თავისუფლება მიშას!” გაჩნდა.
ფოტოები “ოდიშინიუსს” იმ პირთა ჯგუფმა მიაწოდა, რომლებმაც წარწერები გამოსახეს, თუმცა, ჯერჯერობით, ინკოგნიტოდ დარჩენა ისურვეს.
“ამ მოქმედებით ვუერთდებით ათეულ ათასობით საქართველოს მოქალაქის (და არამარტო ჩვენი თანამოქალაქეების) მოთხოვნას მიხეილ სააკაშვილის გათავისუფლების შესახებ და სოლიდარობას ვუცხადებთ მესამე პრეზიდენტს”, – უთხრა ოდიშინიუსს ჯგუფის ერთერთმა წარმომადგენელმა.
შეგახსენებთ, საქართველოს მესამე პრეზიდენტი მიხეილ სააკაშვილი, 1 ოქტომბერს დააკავეს და მას შემდეგ პროტესტის ნიშნად შიმშილობს. მისი გათავისუფლების მოთხოვნით პერმანენტულად ტარდება აქციები რუსთავის პენიტენციურ დაწესებულებასთან, სადაც მიხეილ სააკაშვილია მოთავსებული.
ხანგრძლივი შიმშილობის გამო მისი ჯანმრთელობის მდგომარეობა გაუარესებულია და შესაძლოა, ჰოსპიტალიზაცია გახდეს საჭირო, თუმცა, ხელისუფლების წარმომადგენლები ამბობენ, რომ კერძო კლინიკაში მისი გადაყვანა არ მოხდება და ჰოსპიტალიზაციის შემთხვევაში მესამე პრეზიდენტს გლდანის ე.წ. ციხის საავადმყოფოში გადაიყვანენ, რაც, შესაბამისი სამედიცინო ინფრასტრუქტურის არარსებობისა და უსაფრთხოებასთან დაკავშირებული შესაძლო პრობლემების გამო, დაუშვებლად მიაჩნიათ მიხეილ სააკაშვილის ადვოკატებს.
