“მინდა ვთქვა, რომ წუხელ მიხეილ სააკაშვილის ანალიზებში ერთერთი საციცოცხლო მაჩვენებელი დაეცა კრიტიკულ ზღვრამდე და საჭირო გახდა ექიმ-რეანიმატოლოგის ჩარევა, რის შემდეგაც ეს მაჩვენებელი დასტაბილურდა”, – ამის შესახებ საქართველოს მესამე პრეზიდენტის ერთერთმა ადვოკატმა დიტო საძაგლიშვილმა მას შემდეგ განაცხადა, რაც მიხეილ სააკაშვილი რუსთავის ციხეში მოინახულა.
დიტო საძაგლიშვილის განცხადებით, სიცრუე გამოდგა ხელისუფლების წარმომადგენლების, კონკრეტულად კი იუსტიციის მინისტრის განცხადება იმასთან დაკავშირებით, რომ ისინი კონსილიუმის რეკომენდაციებს ზედმიწევნით ზუსტად შეასრულებდნენ, რადგან სახეზეა ფაქტი, რომ კონსილიუმის რეკომენდაცია არ სრულდება.
“ხელისუფლების მხრიდან ხდება მიხეილ სააკაშვილის სიცოცხლითა და ჯანმრთელობით მანიპულირება, რაც ქართულმა საზოგადოებამ არ უნდა დაუშვას”, – განაცხადა ადვოკატმა ბექა ბასილაიამ და დაამატა, რომ იუსტიციის მინისტრი არ საუბრობს მესამე პრეზიდენტის უსაფრთხოებასთან დაკავშირებულ საკითხებზე, რაც მისი თქმით, ასევე, მიუღებელია.
შეგახსენებთ, საქართველოს მესამე პრეზიდენტი რუსთავის პენიტენციურ დაწესებულებაში, უკვე 25-ე დღეა, შიმშილობს.