მესამე პრეზიდენტი კოალიციური გუნდის დასახელებას ეხმაურება და ახალ მიმართვას ავრცელებს, რომელსაც უცვლელად გთავაზობთ:
მე მთლიანად მხარს ვუჭერ ჩვენი თბილისის მთავრობის მრავალფეროვნებას და კოალიციურ მმართველობას დედაქალაქში. ახლა როგორც არასდროს, ჩვენ გვჭირდება საზოგადოების გაერთიანება, ფართო საზოგადოებრივი გაერთიანება საერთო იდეის გარშემო. შეიცვალოს ოცნების რეჟიმი მრავალპარტიული და მრავალფეროვანი და ეფექტური მმართველობით, ნიკა მელიას ხელმძღვანელობით.
ამისათვის უმნიშვნელოვანესია ყველამ ჩავკიდოთ ერთმანეთს ხელი, პოლიტიკურმა პარტიებმაც და მოქალაქეებმაც და არჩევნებში დავამარცხოთ ქართული ოცნების რეჟიმი და დავიცვათ არჩევნების შედეგი. მივესალმები ხალხზე ორიენტირებული პოზიტიური დღის წესრიგის მთავარ ოპოზიციურ გზავნილად ქცევას. მივესალმები ამ გზავნილების კიდევ უფრო გაძლიერებას. ყველა ჩვენს გულშემატკივარს შევახსენებ, რომ ჩემი ტყვეობიდან დახსნის გზა სწორედ 30 ოქტომბერს, მეორე ტურში, არჩევნებში აქტიურ მონაწილეობაზე და რეჟიმისთვის ხმების გაყალბების შესაძლებლობის არმიცემაზე გადის.
ჰაერში ტრიალებს გამარჯვების და ცვლილებების სუნი და ეს შანსი ჩვენ ხელიდან არ უნდა გავუშვათ” ნათქვამია მიხეილ სააკაშვილის მიმართვაში.
ენმ-ს თბილისის მერობის კანდიდატმა ნიკა მელიამ დღეს კოალიციური გუნდი წარადგინა. ცნობილია ვიცე მერობის, მერის მოადგილეობის, ასევე მერიის საქალაქო სამსახურების ხელმძღვანელების კანდიდატურები.
თბილისის კოალიციური მთავრობის კანდიდატები ენმ-ს, ლელოს-, ევროპული საქართველოს, გირჩი, ერთიანი საქართველოს, წარმომადგენლებითაა დაკომპლექტებული.