ზუგდიდის მუნიციპალიტეტის საკრებულოს წევრი ედიტა კოდუა, რომელიც სამტრედიაში „ნაციონალური მოძრაობის” საწინააღმდეგო აქციის მონაწილეებს შორის იმყოფებოდა, რადიო თავისუფლებასთან საუბარში აცხადებს, რომ ადგილზე მივიდა, რათა ინციდენტი არ მომხდარიყო მოქალაქეებს შორის.
მისი სიტყვებით, შემთხვევით შეიტყო, რომ მოქალაქეები „ნაციონალური მოძრაობის” მომხრეთა ავტოკოლონისთვის სირცხვილის დერეფნის მოწყობას გეგმავდნენ და საჭიროდ ჩათვალა მათ გაჰყოლოდა:
„ვისაც სურვილი ჰქონდა, ჩვენ ვერ დავუშლიდით წასვლას… მშვიდობიანი აქცია ჰქონდათ მოქალაქეებს და ინციდენტი რომ არ მომხდარიყო, ამიტომ წამოვყვევით ჩვენ [საკრებულოს წევრები]. ჩვენ ყველა ზუგდიდელები ვართ და ეს რომ დასრულდება, ერთად უნდა ვიცხოვროთ ისევ და არ მინდოდა ინციდენტი მომხდარიყო”, – განაცხადა ედიტა კოდუამ.
მისი ინფორმაციით, აქციას პოლიცია აკონტროლებდა და ინციდენტი არ მომხდარა. როგორც საკრებულოს წევრი ირწმუნება, აქცია მალევე დასრულდა და უკვე სამტრედიიდან ზუგდიდში ბრუნდებიან.
პარლამენტის წევრმა ანა წითლიძემ, რომელიც სამეგრელოდან თბილისში მიმავალ კოლონის ერთ-ერთ ავტომანქანაში იმყოფება, გავცელა ინფორმაცია, რომ სამტრედიასთან მათ საპროტესტო აქცია მოუწყვეს „ქართული ოცნების” წარმომადგენლებმა და თბილისში მიმავალ აქციის მონაწილეებს შეურაცხყოფას აყენებდნენ,
მისი ინფორმაციით, სამტრედიაში დაახლოებით 40 ადამიანი იყო შეკრებილი, რომლებსაც ხელში ცოცხები ეჭირათ. ანა წითლიძის თქმით, მათ შორის იყვნენ ზუგდიდის საკრებულოს წევრები თაზო ფაცაცია, ედიტა კოდუა და ზაზა პროკოპენკო.