მიტროპოლიტმა ნიკოლოზ ფაჩუაშვილმა, რომელმაც ხელი მოაწერა პეტიციას მიხეილ სააკაშვილის გათავისუფლების მოთხოვნით, ხოლო დღეს ციხეში მოინახულა იგი, ციხის დატოვების შემდეგ ჟურნალისტებს განუცხადა, რომ სთხოვა ექსპრეზიდენტს თავის მომხრეებს შერიგებისკენ მოუწოდოს.
“გვქონდა ჩვეულებრივი ადამიანური საუბარი. მე მქონდა მის მიმართ გზავნილი, თქვენც გეხებათ ეს სუყველას. მე მგონია, რომ მთელი ქვეყანა ვდგავართ დიდი გამოწვევის წინაშე. გამოსავალი არის შევწყვიტოთ სიძულვილის რიტორიკა, შევწყვიტოთ ერთმანეთზე ცუდი საუბარი. მე ვთხოვე ბატონ მიხეილ სააკაშვილს, მოეწოდებინა თავისი მომხრეებისთვის, ვისაც შეიძლება, რომელ ტელევიზიებსაც შეიძლება, რომ მოუწოდოს ყველას, რომ ვიფიქროთ შერიგებაზე, ქრისტიანულ მიტევებაზე. ჩვენ ბევრი გვაქვს ერთმანეთისთვის მისატევებელი”, – განაცხადა ნიკოლოზ ფაჩუაშვილმა.
რაც შეეხება ყოფილი პრეზიდენტის მდგომარეობას, ფაჩუაშვილი ამბობს, რომ ის “ჩვეულებრივად გამოიყურება”.