საქართველოს შინაგან საქმეთა მინისტრი ვახტანგ გომელაური ბათუმში ჩავიდა. მედიასთან საუბარში იგი ამბობს, რომ არსებული ინფორმაციით, ახლა ბათუმში ჩამონგრეულ კორპუსში 10-15 ადამიანია მოყოლილი. თუმცა შეიძლება ეს რიცხვი უფრო მეტი ან ნაკლები იყოს. დეტალებზე მან ახალი ვერაფერი თქვა.
“რაც მოხდა, ყველამ ნახეთ, გააშუქეთ, მთელმა საქართველომ ნახა. მძიმე სიტუაციაა ნამდვილად… დაახლოებით 5 სართულია ჩამონგრეული, ჩვენი ინფორმაციით, დაახლოებით 10-15 ადამიანი უნდა იყოს მოყოლილი შიგნით, კონტაქტზე გამოდის 2 ადამიანი, რომელიც ცოცხალია და გვესაუბრება ტელეფონით, თუმცა ვერ გვიხსნიან სად არიან…
100 და 200 ადამიანი მუშაობს, ერთმანეთს ცვლიან… სწრაფად მუშაობა ვერ გამოდის, შეიძლება რამე მოხდეს – ძალიან მაღალ, პროფესიონალურ დონეზე მუშაობენ… ჩვენი ინფორმაციით, მიმდინარეობდა სამშენებლო სამუშაოები, შეიძლება ეს იყოს მიზეზი საყრდენი კედლის გამოცლის”, – თქვა გომელაურმა.