,,ქვეყანაში არის ძალიან დიდი პოლიტიკური კრიზისი” – ეს განცხადება საქართველოში მიმდინარე პროცესებთან დაკავშირებით, ,,ნაციონალური მოძრაობის” ერთ-ერთმა ლიდერმა, ხატია დეკანოიძემ გააკეთა.

დეკანოიძის თქმით, ივანიშვილის ხელისუფლება დღეს მიდის ყველაფერზე, რომ შეინარჩუნოს ძალაუფლება და ისევ  ერთპიროვნულად აკონტროლოს ქართველი ხალხი.

,,მიუხედავად იმისა, რომ ,,ქართულმა ოცნებამ” ქვეყანაში ჩაატარა არჩევნები, დაიწერეს რაღაც კონკრეტული ციფრები და ასე შემდეგ, არის ძალიან დიდი პოლიტიკური კრიზისი და ამის კრიზისის პირველი განზომილება არის ის, რომ საქართველოს მესამე პრეზიდენტი ზის ციხეში, ივანიშვილის მართლმსაჯულებით და შიმშილობს, ამიტომ მისი განთავისუფლება არის უპირობო გადარჩენა ქვეყნის მომავლის და მეორე ეს არის ,,ქართული ოცნების” მმართველობა, რომელიც უკავშირდება იმ პირველ განზომილებას და ხმების მოპარვას, მოდით ყველამ ვთქვათ, როგორ ჩატარდა არჩევნები:

ქუთაისში მოახერხეს გაყალბება, მაგრამ იმ რაოდენობით ვერა, როგორც სხვაგან და მიუხედავად მთელი ამ მანიპულაციებისა, ადამიანების სიბრძნემ გადაწონა ყველაფერი. ის რაც ხდება დღეს ზუგდიდში ეს არის არჩევნების გაუქმება. საკრებულოში უმრავლესობა რომ არ შეექმნა ,,ნაციონალურ მოძრაობას” მოიპარეს ხმები და გახსნეს ბიულეტენები”, – განაცხადა ხატია დეკანოიძემ.

დეკანოიძის შეფასებით, ზუგდიდის #67 საოლქო-საარჩევნო კომისიის თავმჯდომარე მირანდა მესხი არის დამნაშავე, რომელმაც მართლმსაჯუელების წინაშე პასუხი უნდა აგოს.

,,ის რასაც მირანდა მესხი აკეთებს ახლა, ეს არის ჩვეულებრივი სისხლის სამართლის დანაშაული, მათ მოლოდინი აქვთ, რომ ამ დანაშაულს არავინ არ შეიმჩნევს, მაგრამ ეს ასე არ დარჩება. მე არ მესმის რად უღირს ამ ადამიანს ასეთი ქურდობა, ან იმ ადამიანებს ვინც ,,უპრავებს” ამ ყველაფერს, მაგრამ ეს ხელისუფლება ყველაფერზე წამსვლელია და მათ არ აქვთ არანაირი მუხრუჭი და წითელი ხაზები და ზღვარი.