ზუგდიდის საარჩევნო ოლქის მე-11 საარჩევნო უბანზე, მაჟორიტარული ხმების ხელახლა გადათვლის შემდეგ აღმოჩნდა, რომ ენმ-ის კანდიდატმა მანუჩარ ფიფიამ, რომელმაც 2 ოქტომბრის მონაცემებით, “ქართული ოცნების” კანდიდატს ორი ხმით აჯობა, ნაკლები ხმები მიიღო, ვიდრე 2 ოქტომბრის შემაჯამებელ ოქმში იყო აღნიშნული: ხელახლა გადათვლის შედეგად, ამ ოლქში გამარჯვება “ოცნების” კანდიდატმა გოგოხიამ მოიპოვა, რომელსაც გადათვლის შემდეგ 12 ხმა დაემატა და საბოლოო ჯამში, ენმ-ის კანდიდატზე 10 ხმით მეტი მიიღო.

ეს იმას ნიშნავს, რომ ამ დრომდე არსებული სტატუს-ქვო ზუგდიდის საკრებულოში შეიცვალა, მაგრამ მანდატების უმრავლესობას ჯერ კიდევ ერთიანი ნაციონალური მოძრაობა ფლობს: 45 მანდატიდან, დღეის მონაცემებით, ენმ-ს 22, ხოლო “ქართულ ოცნებას” 19 აქვს. სამი მანდატი საკრებულოში გიორგი გახარიას პარტიას აქვს მოპოვებული, ხოლო კიდევ ერთი მანდატის ბედი მეორე ტურში გადაწყდება და მას ან ენმ, ან “ოცნება” მოიპოვებს.