საქართველოს მესამე პრეზიდენტს მიხეილ სააკაშვილს, რომელიც რუსთავის მე-4 ციხეში იმყოფება, ხელისუფლებამ ტელეფონზე წვდომა, კონკრეტულად, ზარების განხორციელების უფლება შეუზღუდა, რაც კანონდარღვევაა, რადგან მიხეილ სააკაშვილი, დღევანდელი მონაცემებით, მსჯავრდებულია.
რაც შეეხება დეპუტატების უფლებას, შეხვდნენ პატიმრებს, მიხეილ სააკაშვილთან დაკავშირებით შეცვლილია – საქართველოს პარლამენტის თავმჯდომარის კახა კუჭავას გადაწყვეტილებით, საქართველოს პარლამენტის წევრებს მესამე პრეზიდენტთან შეხვედრა აეკრძალათ. მაგალითად, დღეს მიხეილ სააკაშვილთან არ შეუშვეს პარლამენტის წევრი ლევან ხაბეიშვილი.
დღეს ცნობილი გახდა ასევე, რომ მიხეილ სააკაშვილისთვის აღკვეთის ღონისძიების შეცვლის შესახებ დაცვის მხარის შუამდგომლობის განხილვა, მინიმუმ, 10 ნოემბრამდე არ გაიმართება. ადვოკატების განცხადებით, ხელისუფლება ამ გადაწყვეტილების არგუმენტად იმას ასახელებს, რომ განსახილველად განსაზღვრული ვადა არ არსებობს. ადვოკატები ასევე, აცხადებენ, რომ ეს გადაწყვეტილება აბსურდულია და ძალიან კარგად ახსოვთ, რომ პროკურატურის შუამდგომლობებს, მათ შორის, ნიკა მელიასთვის აღკვეთის ღონისძიებად პატიმრობის შეფარდების შესახებ, 24 საათის განმავლობაში განიხილავდნენ.