საქართველოში მიმდინარე არჩევნებს ევროპარლამენტარებიც აკვირდებიან. ევროპარლამენტის სადამკვირვებლო ჯგუფის წარმომადგენლები ცენტრალურ საარჩევნო კომისიის თავმჯდომარეს ხვდებიან.
მათ მედიასთან კომენტარი გააკეთეს:
“ყველა ჩვენგანი იმედოვნებს რომ დღევანდელი დღე ქართველი ხალხისთვის და თითოეული ჩვენგანისთვის დემოკრატიული პრინციპების დაცვით ჩაივლის. იმედი გვაქვს მაღალი აქტიურობა იქნება და საკუთარ არჩევანს ბევრი ადამიანი დააფიქსირებს. ევროკავშირისთვის მნიშვნელოვანია კანონის უზენაესობა, დემოკრატიული პრინციპებისა და ადამიანის უფლებების დაცვა”, – თქვა კორინა კრეტუმ.
ევროპელი დიპლომატების განცხადებით თავისუფალი, სამართლიანი და გამჭვირვალე არჩევნების მოლოდინი აქვთ და ამასთანავე მტკიცე მხარდაჭერას უცხადებენ საქართველოს ევროპული ინტეგრაციის გზაზე.
“ჩვენთვის მნიშვნელოვანია რომ საქართველომ მისი ევროპული ინტეგრაციის გზა გააგრძელოს. ეს არის მთავარი მიზეზი რატომაც დღეს აქ ვიმყოფებით და არჩევნებს ვაკვირდებით.
საქართველოს ოფიციალურ პირებთან მოლაპარაკებების მთავარი თემაც ეს არის. შევხვდით საქართველოს პრემიერს და დავაფიქსირეთ ძლიერი და მკაფიო პოზიცია რომ გვსურს საქართველოსთან თანამშრომლობის გაგრძელება. არ გაჩერდეთ და იბრძოლოთ დემოკრატიისთვის, რადგან თუ ჩაგეძინებათ დემოკრატიის გზაზე, მეორე დღეს დიქტატურაში გაიღვიძებთ. მხარს ვუჭერთ საქართველოს და მის ევროპულ მომავალს”, – თქვა ტომას ზდეჩოვსკიმ.
“თავისუფალი, სამართლიანი და გამჭვირვალე არჩევნების მოლოდინი გვაქვს. დღეს საქართველოს ცენტრალურ საარჩევნო კომისიაში მიმდინარე პროცესებზე, არჩევნებთან დაკავშირებულ საკითხებზე ვისაუბრებთ. ჩვენ ვდგავართ დემოკრატიის, კანონის უზენაესობის, თავისუფალი, სამართლიანი და გამჭვირვალე არჩევნების მხარეს”, – თქვა ვიქტორ ნეგრესკუმ.